Shillong, Risaw 30: Ka Rangdajied United FC ka la ïoh ban khur ïa ka jingjop kaba nyngkong ha ka lympung OC Blue Shillong Premier League 2024 da kaba pynliem ïa ka Ryntih FC da 3-0 kol ha madan First Ground jong ka SSA, Polo, ha ka janmiet jong ka sngi Palei.
Hadien ka kylla step kaba khlem lah pynkhihjar watla baroh arliang mamla ki la ïoh shibun ki kabu ksiar, u Pasborlang Khonglikong (78’, 90’+3) bad u Manbhakupar Iawphniaw (88’) ki la wanrah jingkylla ïa ka jingïalehkai da kaba sdang pynkhihjar na bynta ka Rangdajied ban pynthikna ïa ki lai point ba pura ba nyngkong mynta ka samoi.
Lah ban kdew ba ka Ryntih kam pat ju lah ban pynliem mynno mynno ruh ïa ka RUFC ha ka SPL bad na bynta jong ki kane ka dang ïai bteng. Naduh ka SPL 2019 ka Rangdajied ka la jop san sien bad ïakhaid shi sien, kynthuplang ïa ka namjop ba la khur ha ka sngi Balang.
Baroh arliang mamla ki la wanrah katto katne ki jingkylla ha ka kynhun na ka ïalehkai ba sdang jong ki.
Hadien ka jingpyrshang kaba shyrkhei kaba la pynsmiej ïa ka liang pyrshah, u Pasborlang u la khyrwit biang sa shisien na jngai ha kaba u rangapkol ka Ryntih (substitute goalkeeper) u Luckystar Lawai u la ïoh ban kyrda tiak da ki shympriah hynrei u khlem shym la lah pat ban ïada ïa ka bol ban rung shapoh kol.
Ka kol kaba ar ruh ka urlong na ka jingpyrshang kaba kham jngai jong u Manbhakupar ha ka 88 minit, bad nangta ka bol kaba paka la pashat hapoh phyllaw kol na bynta u Pasborlang uba la pynlong bad pynthikna ïa ka Rangdajied ban jop da 3-0 kol shuwa ban wai.
Ka jingïalehkai ha kane ka sngi Palei, ka kynhun ba don shatrai duh- kata ka Nongthymmai SC kan aireng pyrshah ïa ka Nongrim Hills SC ha ka por 5 shiteng janmiet.
