Ngi la pynkhreh ka kaiphod, hynrei ngi dang ap ïa ka jubab ka Assam ban pynbeit pud, ong u Bah Paul

Shillong, Risaw 29: U Chairman jong ka Regional Committee jong ka West Khasi Hills, u Bah Paul Lyngdoh u la ong ba ka kaiphod kaba khatduh ynsa aiti sha ka sorkar jylla tang hadien ba la don ka jingjurip khappud lang bad ka jylla Assam, khamtam eh ki jaka baïakajia kiba hab hapoh ka thaiñ Langpih.
Haba kren sha ki lad pathai khubor ha ka sngi ba ar u Bah Lyngdoh u la ong, “Ngi la pyrshang ban ïakren bad ka Assam bad nga la kyntu ïa DC jong ka West Khasi Hills ban ïakren bad DC jong ka Kamrup bad kumba long haduh mynta ngim pat ïoh ïa ka jubab kaba biang bad kam pat don kano kano ka jingpyrshang kaba mynta na ka bynta jong ngi ban pynkutnoh ïa kane ka kam.”
“Ngin sa aiti ïa ka kaiphod kaba khatduh tang hadien ba la ïoh ban leit jurip ïa ki jaka kiba shah ktah bad halor kane ka kam ngi la buh ruh ba hapoh ka bnai tlang jong u snem 2024 kane ka kam kan dei ban long, kumta ngi dang ap ïa ka jubab na ka sorkar Assam,” u la bynrap.
Haba kylli na ka liang u Myntri sorkar u la ong ba ka regional committee ba la khlieh da ma u ka la dep ban sam ïa ki kot ki sla sha ka Assam ban pynpaw ïa ki jingkam jong ka Meghalaya ïa kumba 54 tylli ki shnong hapoh thaiñ Langpih ha ka jingïalang kaba la long dangshen ha Hotel Pinewood.
“Ngi la sam ïa kine ki kot bad ka jubab ka la long kaba biang bad mynta ngi donkam sa tang ban jam ïa kawei ka jingeh kaba dei ka jingleit jurip sha kine ki jaka ba la shah ktah, khnang ba ngin lah ban ïakynduh ïa ki nongshong shnong jong kine ki jaka. Kane kadei ka kam kaba dangsah, kaba ngi hap ban jam shakhmat,” u la bynrap.
Haba kylli la ka jingïasam jaka markylliang ne ka give and take policy kan treikam ne em ha kane ka jingïakren pyndep ïa kane ka jingïakajia pynbeit pud, u Bah Lyngdoh u la ong, “Ngin nym ong ïa ka jingïasam jaka ne ka give and take naba baroh ka shong ha u pud bad ki jingpyrkhing, kaba ngi la ithuh kum ka khana pateng ki shnong bad kiwei kiwei.”