Shillong, Risaw, 29: Ki nongïalam jong ka KSU Bangalore Unit ha ka sngi Baar ki la wan khnang na Bangalore sha nongbah Shillong ban mudui da ka ejahar pyrshah ïa ka Silvia Tham, ba ju tip paidbah da ka kyrteng sin @Anisha bad kaba ai kyrteng sin ïalade ha ka Instagram kum ka @Queen-beB halor ka jingkren pynjah burom da ki ktien kiba pynpohdor bad kiba ktah mationg ka jaidbynriew Khasi kaba la jia ha kine ki khyndiat sngi ha kaba ki video ki la saphriang stet hapoh ka rynsan jong ka social media.
Ïa ka ejahar ka KSU ka la ujor ha u Superintendent of Police (City) ka East Khasi Hills u Dr. Dara Aswaghosh. Ha ka jingïakren bad ki lad pathai khubor hadien ba la mudui da ka ejahar, u President jong ka KSU Bangalore Unit u samla Donboklang Nongphud u la ong ba ka jingleh jong ka Silvia Tham ka la pynjah burom ïa ki samla Khasi kiba pule bad kiba trei ha nongbah Bangalore, Karnataka.
“Ïa ka jingleh jong ka na ka por sha ka por, ngim lah shuh ban sngap bad ngim kwah ban ujor ejahar naduh mynshwa hynrei ki jingleh jong ka ki la pynthohbria ïa ka jaidbynriew khamtam ïa ngi kiba pule ha Bangalore, khamtam ïa ki kynthei bad ka jingleh jong ka marwei ka la pynjah burom lut ïa ki. Ka jingleh jong ka, ka la pynthohbria ïa ka jaidbynriew bad ngim lah shuh ban shu sngap bad ngi la hap ban wan sha Shillong ban ujor da ka ejahar,” ong u samla Nongphud.
U la ïathuh ba ka seng ka la ïasyllok shwa bad u Commissioner of Police jong ka Belagavi, Karnataka, u Bah Ïada Martin Marbaniang ha kaba u la ai jingmut ïa ka seng ba kan kham bha ban ujor ejahar ym ha Bengalore hynrei ha Shillong.
“Ka jingujor ïa ka ejahar ka long ban ai jingsneng ïa ka (Silvia Tham). Kaei kaba ka leh shimet ngim don jingwit, hynrei kaei kaba ka la kren ïa ka jaidbynriew jong ngi, ïa kata, ngi hap ban shimkhia,” u la ong.
U la ïathuh ba u SP (City) u la ïathuh ha ki nongïalam ka KSU ba un sa phah jingtip sha ki bor Pulit jong ka jylla Karnataka halor kane ka jingujor jong ka KSU pyrshah ïa ka Silvia Tham.
U samla Nongphud u la ong, ‘naduh ba la saphriang ki video jong ka (Silvia Tham) bun ki kynthei Khasi kiba pule ha Bangalore ki la shah kynthoh.”
Haba kylli, u la ïathuh ba bun ki kompeni kiba ka Silvia Tham ka la trei ha Bangalore bad ïa mynta ka trei ha kawei ka Spa ne ka jaka khem met.
Ha ka lah sngi u Blei ka Hynñiewtrep Integrated Territorial Organisation (HITO), Shillong ruh ka la mudui da ka ejahar pyrshah ïa ka Silvia Tham.
