Shillong, Risaw 29: U Myntri Khynnah jong ka sorkar pdeng ba dei khmih ïa ka Tnad External Affairs and Textile, u PabitraMargherita u la ai jingkren ha ka jingïalang ha ka RozgarMela 2024 ba la pynlong ha ka sngi baar ban rakhe ïa ki jingsdang ba thymmai jong ki hajar ngut ki samla ba dang rung kam thymmai bad ban jur ïa ka jingkut jingmut jong ka sorkar na ka bynta ka India kaba seisoh bad kaba lah ban kyrshan dalade.
“Mynta ka sngi kam dei tang ka jingïalang,” la ong u Myntri, “Kadei ka jingrakhe ïa ka jingkyrmen, ki jingsdang ba thymmai bad ki kabu kiba ïar. Kane kadei ka sngi ba ki jingangnud ki sdang ban urlong, bad ka lawei jong ki samla jong ngi ka kham phyrnai shuh shuh.” U la ban jur halor kumno ka RozgarMela ka pyni ïa ka jingïalam ba ïohi jngai jong u Myntri Rangbah duh Narendra Modi, bad ka jingtrei jong u na ka bynta ka Atmanirbhar Bharat ka aibor ïa ka jingïaid lynti ka India sha ka roi ka par.
Kum shi bynta kane ka sienjam, la sam palat 51,000 tylli ki shithi thung kam ha kylleng ka ri, kaba la buh ïa ki samla ha ki kam bapher bapher ha ki tnad bapher bapher jong ka sorkar pdeng. “Kane kadei ka jingkular jong u Myntri Rangbah duh jong ngi ban pynthikna ba ym don mano mano ba shah iehdien ha ka jingïaid lynti jong ngi sha ka India kaba la kiew shaphrang bad kaba seisoh,” la ong u Myntri. Ha jylla Meghalaya la sam 207 tylli ki shithi thung kam sha ki samla ba dang rung kam thymmai, ha kaba 191 tylli kidei na ka Tnad Post, 15 tylli na ka Tnad Rel bad 1 ha NIT Meghalaya.
Ha nongbah Shillong, ki samla kiba wan shakhmat na Meghalaya, Manipur, Nagaland, Mizoram, Tripura, bad Assam ki la ïadonlang ban rakhe ïa une u mawmer, kaba pyni ïa ka jingkut jingmut jong ka sorkar ban poi sha man ki jaka jong ka ri, kynthup ka thaiñ shateilammihngi kaba ïar bad kaba bun ki jingdon jingem. Ha ka jingkyntu ïa ki samla ban trei shitrhem ha ka kam jong ki, u Myntri u la ong, “Kane ka sngi kam dei shaphang ki statistics, kadei shaphang jong phi. Phi dei ki nongrah ktien na ka bynta ka thong jong ka sorkar jong ngi na ka bynta ka India. Ka jinglong hok, ka jingaiti bad ka jingkut jingmut jong phi kin long ka nongrim jong ka jingkiew shaphrang ka ri jong ngi,” u la ong.
Ha ka khubor sha ki kandidet bad kiba haïing jong ki, u Myntri u la ai khublei, bad ong ba kane ka jingïalang kadei ka por jong ka jingsngewsarong ïa ka ri. U la pynshlur ïa baroh ban ïatreilang ban tei ïa ka lawei kaba seisoh, kaba kynthup ïa baroh, bad kaba dap da ki kabu ïa man u briew jong ka ri.
Ha ka jingïakren bad ki lad pathai khubor hadien ka jingïalang, u Margherita u la ong ba ka RozgarMela ka dei ka jingïalang kaba kyrpang ba la pynlong ha 40 tylli ki jaka bapher bapher ha India, kynthup hangne ha Meghalaya. “Nga sngewsarong ban ïohi ka jingïadonlang da ki spah ngut ki samla, kiba thrang ban shimti ïa ki bynta ba thymmai jong ki. Ka pynkmen ïa nga ban ïohi ïa ki kandidet kiba la pynpaw ka jingsngewnguh ïa ki sienjam jong ka sorkar,” u la bynrap.
U la bynrap ruh, “kane ka jingïalang ka long ka bym pat ju ïohi mynshuwa, ha kaba la sam palat 51,000 tylli ki shithi thung kam sha ki samla kiba la ïoh ïa ka jingjop. Nga kwah ban ong ba ki samla jong ngi ki la shah pynkupbor da kaba sngap ïa u Myntri Rangbah Duh, uba la ai jingkren ba ki samla bad kiba haïing hasem, baroh ngi dei kiba nohsynniang sha ka jingtei ïa ka ri. U la ïaroh ruh ïa ki samla jong ngi bad kito kiba ïadon bynta ha ki kam Sorkar na ka bynta ka jingkut jingmut jong ki ban ïaid shaphrang sha ka Viksit Bharat.”
U Myntri u la pynpaw ka jingsngewnguh jong u halor kane ka jingjop ha kaba u la ong, “Ym tang kum u Myntri hynrei kum u nongshong shnong jong ka ri India, nga sngewsarong ban sakhi ïa kane ka jingkiew shaphrang ha ka India kaba thymmai, haba ngi ïaid shaphrang ha ka lynti jong ka jingjop.”
Ha kaba ïadei bad ka RozgarMela 2024, ka sorkar ka ban biang ïa ka jingkular jong ka ban kyrshan, ban ïalam lynti bad pynkhreh ïa ki samla jong ka ri da ki sap treikam bad ka jinghikai pyntbit, ban tei ïa ki briew kiba la kloi ban trei na ka bynta ka ri da ka burom.
Ha shuwa kane u Myntri Rangbah duh Narendra Modi u la ai jingkren ha ka RozgarMela bad sam palat 51,000 tylli ki shithi thung kam sha ki samla ba dang rung kam thymmai ha ki tnad sorkar bad ki kynhun lyngba ka video conferencing.
Ha ka jingai jingkren ha ka jingïalang, u Myntri Rangbah duh u la kren shaphang ka jinglehkmen ba kyrpang jong ka Dhanteras bad u la ai ka jingkitbok kitrwiang ha kane ka jinglehkmen. Ha ka jingkren shaphang ka Diwali mynta u snem ba kan long kaba kham kyrpang, u Myntri Rangbah duh u la ong ba kadei ka Diwali ba nyngkong naduh ba la pynshong ïa u Blei Shri Ram ha ka temple ba khraw jong u ha Ayodhya hadien 500 snem. U la ong ba ki pateng ba bun ki la ap ïa kane ka Diwali, katba ki bun kiba la aiti ïa la ka jingim na ka bynta kane lane kiba la mad shibun ki jingeh. U Myntri Rangbah duh u la ban jur ba ka pateng ba mynta ka long shisha kaba donbok ban sakhi bad ban ïadon bynta ha kum kine ki jinglehkmen. Ha ka aïom lehkmen, u Myntri Rangbah duh u la ong 51,000 ngut ki samla ki la ïohpdiang ïa ki shithi rung kam ha ki kam sorkar. U la ai khublei ïa kine ki samla bad kitbok kitrwiang ruh ïa ki.
U Myntri Rangbah duh u la ong ba ka jingai ki kam Sorkar ba la pynskhem ïa ki lak ngut ki samla ka dei ka kam kaba dang bteng. U la bynrap ba da ki lak ngut ki samla ki la ïohpdiang ïa ki shithi rung kam wat ha ki jylla ba synshar ka BJP bad ki nongïatreilang hapoh ka NDA. U Myntri Rangbah duh u la ban biang ïa ka jingkut jingmut jong ka sorkar ba ki samla jong ka ri ki dei ban ïohkam pura. Haba kren shaphang ki polisi bad ki rai jong ka sorkar kiba ktah ïa ka jingplie lad ïohkam, u Myntri Rangbah duh u la kren shaphang ka jingshna ïa ki expressway, ki surok bah, ki surok, ki lynti rel, ki kad lieng, ki kad liengsuiñ, ka jingbuh ïa ki fiber cable, ka jingbuh ïa ki mobile tower bad ka jingpynheh ïa ki karkhana ba thymmai ha baroh ki bynta jong ka ri.
