Khliehriat, Risaw, 29: Ka Jaiñtia National Council (JNC) ba la lam khmat da u General Secretary u bah Wanshwa Suting mynta ka sngi ki la ïakynduh ïa ka Director jong ka tnat DERT (Directorate of Educational and Research Training) Meghalaya, ka kong R.S. Manner, na ka liang ka seng ka la dawa bad pynsngew ïa ki mat kiba donkam kiba iadei bad ka jingbym thep nonghikai, ka jingbym biang ki jaka leit shabar, ka jingpynslem ïa ki scholarship jong ki khynnah pule bad ka jingpynlong ïa ka exam MTET tang shi sien ha ka ar snem.
Ha kaba iadei bad ka jingbym thep nonghikai shuh ha DIET Thadlaskeiñ mynta la bun bnai ha ka jaka jong ki ar ngut ki nonghikai kiba la shah pynkynriah jaka trei, ka seng ka la pynpaw ka jingsngew khia bad ong ba kane ka buh jingeh ïa ki khynnah pule bad kumjuh ruh ïa ki nonghikai “Kane ka jing pynkynriah jaka trei ïa ki nonghikai ka la jia na ka por sha ka por bad ym ju thep bujli shuh da kiwei bad mynta ruh ka la jia biang ha kane kane shlem ai jinghikai ha DIET Thadlaskeiñ, ki nonghikai kiba ju hikai ïa kiwei pat ki subject mynta ki hap ban hikai lang sa ïa kita kiwei pat ki subject jong kito ki ar ngut kiba la shah pynkynriah jaka trei bad kane ka long kaei kaei kaba lah ban ong ba kam pynhun ïa ki nongpule bad ha kajuh ka por kane ka la long ruh kum ba ban khia ïa ki nonghikai ki bym dei kita ki nonghikai kiba na kita ki subject hynrei ki hap ban hikai pat tang ban shu pyndep ïa ki course, “Kumta ngi dawa ba dei ban thep bujli noh da kiwei ki nonghikai ha kitei ki jaka ba dang lait khnang ba kan nym buh jingeh ïa ki khynnah bad ki nonghikai ” pynpaw u bah Wanshwa Suting.
Kawei pat ka jingdawa jong ka seng ka long ban pynbit pynbiang bha ïa ki jaka leit shabar bad halor kane u bah Wanshwa Suting u la ong “Don ruh ki jingeh ba ki nonghikai bad ki khynnah pule ki iakynduh ha katei ka DIET Thadlaskeiñ, namar ka jingbym biang ki jaka leit shabar, ynda la jur u slap ka lah ban twa ha kano kano ka por”
Kumjuh ruh ka seng ka dawa na ka tnat DERT ba dei ban pynlong ïa ka exam Meghalaya Teacher Eligibility Test (MTET) man la u snem namar kumba long mynta ïa kane ka exam la ju pynlong tang shi sien ha ka ar snem bad kane ka lah ban ktah ïa ka por bad ka kyrta jong kito ki nonghikai kiba donkam ban pass ïa kane ka exam bad ruh lada jia ba ki nongiakhun exam kim pass ka lah ban ktah shuh shuh ïa ka por jong ki bad ïa ka kyrta bad kane kan ktah ruh ïa ka ioh kam ioh jam jong ki.
Ka seng ka la iakren ruh bad ka kong Manar ha kaba iadei bad ka jingpynslem ïa ka scholarship jong ki khynnah kiba pule ha DIET bad halor kane ka kong Manar ka la ong ba ka sorkar ka la dep pyllait ïa ka pisa scholarship bad kan nym slem shuh ba ki khynnah kin ioh ïa kane ka scholarship kaba ki dei ban ioh.
Ka seng ka la iathuh shuh shuh ba ka Director jong ka tnat DERT, ka kong R.S.Manar ka la ong ba ha kaba iadei bad kitei ki kam ar tylli ba lait ha DIET Thadlaskeiñ na ka liang ka tnat kan sa pyllait noh ïa ki advertisement bad shen yn sa lah ban pynbit pynbiang ïa kane ka jingduna nonghikai.
