Ka Gambegre kan hap ban ïakhun ïa ka kam bam sap lada kwah kam pynroi, ong u MDC Tura

Shillong, Risaw 22: U Kyrtong ka BJP bad u MDC ka Tura u Bernard N Marak ha ka sngi baar u la ong ba ka seng kan ïakhun ïa ka elekshon shiteng samoi na Gambegre na ka bynta ka jingsynshar kaba bha, ban pynkupbor ïa ki nongshong shnong lyngba ki kam synshar paidbah naduh na la tynrai bad kumjuh ruh ban pynkutnoh ïa ka kam bamsap ha kaba kane ka la ktah bha ïa ka jingim jong ki nongshong shnong.
“Ki nongshong shnong jong ka Gambegre kin hap ban jied hadpeng ka kam bam sap bad ka jingbha jong ka synshar khadar. Kidei ban kwah hapdeng ka jinglong sahdien bad ka jingkiew ha ka ïoh ka kot, bad ban kyrshan ïa ki lanot ha ka imlang sahlang ne ban ïaleh pyrshah ïa kiba bun ki jingduna bad ban angnud ruh ïa ka jingpyndap dalade ïalade,” ong u Marak.
U la ong ba ki longïing kiba duk bad kiba shida ki long barabor ki la lanot hapoh ka Gambegre Constituency na ka daw ka jingbym biang ka synshar khadar kaba la pynsangeh ïa ki lad jingmyntoi sha ki paidbah bad kumjuh ruh ka jingduh ki lad pynroi kiba dei ban poi sha ki jaka bad ki shnong.
Haba ong ba kane ka elekshon shiteng samoi ha Gambegre kan dei ka jingïakhun kaba itynnad bha, u Marak u la ong ba baroh kito kiba la shah ieh beiñ da ki nongïalam kiba don ha ka bor khlem artatien kin vote beit ïa ka BJP.
“Ki nongthep vote jong ka Gambegre kin sa rai ïa ka lawei jong ki ha ka 13 tarik u Naiwieng bad nga ngeit ki nongthep vote kin jied ïa ki kam pynroi ban ïa ka kam bam sap,” u la ong da kaba bynrap ba ka jingïakhun ha Gambegre kan dei hapdeng ka kurim jong u Myntri Rangbah, u kyrtong ba la jied da u MP mynta bad ka BJP.
Shuh shuh na ka liang jong u Marak u la ong ba ka Gambegre kadei ka constituency ki riewlum bad ka jingïakhun kan dei hapdeng ki heh saiñ pyrthei kiba la synshar ïa kane ka constituency ha ki por ba la leit noh.
“Ka thong jong ngi hapoh Gambegre ka long ban pynkylla ïa kane ka constituency ba kan ïoh ki lad pynroi ban ïa kaba shah ieh beiñ,” u la ong.
U la kynnoh ruh ba kane ka sorkar kaba mynta bad ki sorkar kiba la leit noh ki la ieh beiñ ïa ki nongshong shnong jong ka Gambegre ha kaba bun na ki jingmyntoi kiba kongsan kum ka umbam umdih, ki ïing, ka ïohkam ïohjam, ki ration card bad kiwei kiwei bad kumba long mynta ka jingkiew palat jong ka bai bording ka dei kawei na ki jingeh kaba la ktah bha ïa ki nongshong shnong kiba duk ba kyrduh.
“Ka jingbym biang ha ki rukom pynïaid kam kum ha NREGA, JJM, PMGSY, PMAY, IHHL, NRLM, old age, widow bad ki disabled pension ki dei sa kiwei pat ki kam kiba la ktah bha ïa ki nongshong shnong jong ka Gambegre,” u la bynrap.