Shillong, Risaw 17 : Ka National Institute of Technology, Meghalaya hadien 14 snem ka jingap khmih lynti kan sa ïoh ban treikam noh na ka jong ka jaka treikam kaba don ha Sohra ïa kaba la tei ha ka jinglut kaba kot palat 429 klur tyngka.
Haba pyntip ïa kane ha ki lad pathai khubor, u Director ka NIT-Meghalaya, u Prof Pinakeswar Mahanta u la ong ba kane ka jaka treikam ba thymmai kan kynthup ïa ki hostel jong ki khynnah kynthei bad shynrang, ki jaka bam, ki jaka sah, ki jaka pule kum ki workshops, laboratory, central library bad ruh ka IT centre.
U la ong ruh ba ïa kane la buh thong ban pynkynriah noh sha Sohra ha u Nohprah myntau snem khnang ba ïa ka samoi sdang klas na ka bynta u snem 2024-2025 yn lah ban sdang noh naduh u Rymphang 2025.
Da kaba kam ba katei ka jaka pule kin ngiam haduh palat 1000 ngut ki khynnah, u Director u ïathuh ruh ba ka NIT kan bud ïa ka state reservation policy jong kato ka jylla.
Kum shi bynta jong ka Corporate social responsibility (CSR) , ka NIT ka la shim ruh san tylli ki shnong na ka thain Sohra ban pynbiang kum ka jaka ai jinghikai Computer, nangta ka motorboat ha kawei na kitei ki shnong, ki tiar donkam na bynta ki samla pule, ki solar lantern, ki jaka jiar um, ki tiar donkam jong ki skul bad kiwei kiwei.
Ha kajuh ka por u la pynbna ruh ba ka NIT Meghalaya kan pynlong ïa ka Convocation kaba 11 jongka ha ka 19tarik Risaw ha State Convention Centre, Shillong ha kaba u Suvamoy Saha, the Managing Director jong ka Eveready Industries India Ltd un wan kum u Kongsan.
Ha kane ka sngi kin don haduh 193 ngut ki samla kiban shah pynkup burom da ka kyrdan Degree kata kynthup ïa ki 140 ngut ha ka B.Tech, 9 ngut ha ka M.Tech, 23 ngut ha ka M.Sc bad 21 ngut pat ki PhD.
