Shillong, Risaw, 17: Ka Khun Hynñiewtrep National Awakening Movement (KHNAM) Central Executive Committee ha ka sngi Palei ka la kyntu ïa ka Khasi Hills Autonomous District Council (KHADC) ban pan jingmut lem na ki paidbah nongshong shnong ha kaba ïadei bad ka jingpynbeit thymmai ka Khyrnit Bahynriew jong ka riti synshar ka ri India.
Ha u kyrwoh ba la phah sha ki lad pathai khubor, u Working President ka KHNAM u Bah Thomas Passah, u la ong, “ha kine ki sngi la ïohi biang ïa ka jingïaid shakhmat ka jingïakren halor ka jingpynbeit ïa ka Sixth Scheduled. Na ka liang jong ka seng ka dawa ba District Council ka dei ban pynkhreh bin pa bin bad ban shim jingmut ruh na kiba bun balang halor kane ka kam, khnang ban lait na ka jingmynsaw.”
“Ngi la dep ban ai jingmut halor kane ka bynta ha ki por ba la leit, kiba kynthup ïa ka jingweng noh ïa ka Para 12 (a), ba ym dei ban don kito kino ki kyndon ki ban ai bor ïa ka Sorkar Jylla lane ka Sorkar Pdeng ban tuklar halor ki bor jong ki Autonomous District Council, ban ym dei ban pynkylla ïa ka kyrteng na ka Autonomous sha ka Territorial Council bad ruh ban khanglad ïa kiwei ki Unrepresented Tribe ban long kum kita ki MDC ba shuh sieh,” la ong u kyrwoh.
“Ka District Council ka dei ruh ban buh shwa ha ki rynsan paidbah ïa kita ki jingtyrwa shwa ban phah sha ka Sorkar Pdeng khnang ban lait na ki kynrum kynram hadien. Kum ka seng ngi sheptieng ïoh ka Sorkar Pdeng ka pynkylla ïa ka Sixth Scheduled da ka jingthmu barieh ban ïoh ban tih ïa u marpohkhyndew “Uranium,” la bynrap u kyrwoh.
“Ngi khmih lynti ruh bad ka District Council kan khot ïa ka All Political Party Meeting, shwa ban shim ïa ki rai ba khatduh,” la kyntu ka KHNAM.
