Shillong Risaw 11: Ka Deputy Commissioner ka East Khasi Hills ka Kong RM Kurbah hynne ka sngi ka la ïathuh ba ka kynhun jong ka ki la leit ban jurip ïa ki pandal ba la shna na ka bynta ka Durga Puja bad la shem ba ym don kano kano na ki kiba la tam pud ne kiba la shna ha ki jaka jong ki paidbah bad kam shym la don ka jingpynkheiñ ïa ki kyndon.
Ïa kane ka DC ka la jubab ha kaba ïadei bad ka jingujor jong kawei ka sengbhalang kaba ka la thoh ïa ka shithi kaba ujor ba ka don ka jingshna tam pud ïa ki pandal halor ki surok jong ki paidbah.
Na ka liang ka DC ka la ong ba ka la phah ïa ka kynhun napoh DC ban leit jurip bad ba na ka liang ki magistrate ki la ïatreilang bad ki pulit ban pynthikna ba ka jingrakhe ïa ka puja kan long kaba ïaid beit da kaba suk ba saiñ.
“Naba ka dei ka ri kaba ai ïa ka jingmane kaba laitluid ngi dei ban burom iwei ïa iwei pat bad ban pynthikna ba kane ka puja kan ïaid beit da kaba suk ba saiñ kumba la ju rakhe ruh ïa ka Christmas, Seng Kut Snem bad kiwei kiwei, kumta ngi donkam ban long kiba ïar ka jingmut jingpyrkhat ha kaba ïadei bad kane ka liang,” ong ka Kong Kurbah.
Haba ïadei bad ka shongsuk shongsaiñ bad ban ym don ka jingpynkheiñ ïa ka aiñ, ka DC ka la pyntip ba ki bor pynïaid district ka la khmih bniah manla ka sngi. Ka la ïathuh ruh ba la bthah ïa baroh ki puja pandal committee ba kin buh ïa ki CCTV camera ban ïarap ïa ki bor district shuh buh lada don ki jingjia kiba ym poi pyrkhat bad kumjuh ruh na ki jingma kiba lah ban mih.
