Nongstoiñ, Risaw, 11: Ka seng Hynñiewtrep Achik National Movement West Khasi Hills mynta ka sngi, ka la ïoh ban pynlong ïa ka jingai jingsumar khmat ei sha ki paidbah ïa kaba la tip kum ka Free Screening Eyes Checkup.
Ïa kane ka program la ïoh ban plie paidbah da u bah N. Nongdkhar MDC barim ka Nongstoiñ konstitwensi kum u kongsan, ha kaba la synran lang da u bah Lamphrang Kharbani President ka seng Hynñiewtrep Achik National Movement Sengkmie, u ba la ong ba kane ka jingai jingsumar ei kan ïaid ha man la ki shnong jong ka thaiñ West Khasi Hills District bad yn pyntyllun haduh 6 bnai lynter.
U la ong ba lada i donkam kane ka kynhun kan sa pynsumar ei ïa ki khmat jong ki nongpang kiba donkam ban phah sumar shaduh nongbah Guwahati, khlem da donkam ban siew ei ei lait noh ka bai kali. Hynrei ïa kito kiba donkam ban deng Ïit khmat ruh yn shim tang mar shiteng dor ïa ka bai Ïit khmat.
Ïa ka program sumar khmat la pynlong ha ka shnong Lumpyngad, kawei na ki shnong ha ka thaiñ Umyiap. La pynïaid ïa katei ka jingïalang da u bah Gabriel Sohlang lamphang ka seng HANM West Khasi Hills. Nalor ki dkhot jong ka seng la ïadonlang ruh ki briew kiba na ka koit ka khiah, ki sordar shnong jong katei ka thaiñ bad kiwei kiwei.
