Shillong, Risaw 11: Ka khubor ba la ïoh na ki pulit la ïathuh ba ka Legitha Momin ka la phah ka jingujor ba ha ka 7 tarik mynta u bnai ha ka por kumba 2.30 baje mynstep, ki runar bym lah ban ithuh ki la tuh ïa ka Mahindra pick-up jong ka kaba don u nombar ML-06-8560 na ka shnong Rongjeng Chigisim, East Garo Hills (EGH).
Ha kawei pat ka jingjia ki pulit ki la ïathuh ba ha ka 9 tarik mynta u bnai, ki pulit ha ryngkatlang bad ki shipai BSF ki la pynlong ïa ka jingleit khynra hapoh ka thaiñ Rumbilgittim, South Garo Hills (SGH) bad ki la ïoh ban kurup haduh 190 tylli ka byrni kaba la song da ka shini.
Shuh shuh ki pulit ki la ïathuh ba ha ka 8 tarik mynta u bnai ha ka por kumba 9.30 baje mynmiet hadien ka jingtip kaba thikna na ka liang ki pulit ki la pynlong ïa ka jingleit khynra hapoh ka shnong Bakdagre, South West Garo Hills (SWGH) ha kaba ki la ïoh bat ïa uwei u nong Bangladesh uba kyrteng u Md Eshad, katba u paralok jong u, uba kyrteng u Md Azzi Rahman (Bangladeshi national) u la ïoh lad ban phet krad.
Na ka liang ki pulit ki la ïoh ban kurup kawei ka mobile phone na utei uba la rung tuh sha India.
