Kumba 300 tylli ki tynrai dieng leit thung ka CoRP ha ka shnong Pahamskhen, ka jaka ba don ka krem lymbit

Nongpoh, Jylliew 04: Ka Confederation of Ri-Bhoi People (CoRP) Nongpoh Circle mynta ka sngi kala shim ïaka sienjam ban pynlong da ka jingthung dieng haka shnong Pahamskhen ha Ri-Bhoi kaba dei kawei naki shnong ba pawnam bad khring ruh ïaki nongjngohkai pyrthei halor ka jingdon ka krem lymbit ne ka Pnah kyndeng, kaba dei ruh shibynta ka jingrakhe ïaka sngi pynneh mariang ne ka World Environment Day bad kumjuh ruh ka jingdap 25 snem jong ka jingïaid lynti jong ka seng.
Ka seng kala leit ruh ban thung kumba 300 tynrai ki jait dieng bapher bapher ha katei ka shnong bala shim bynta lang ruh da ki paidbah nongshong shnong, ki khynnah skul jong ka Pahamskhen RCLP School, haka jingdon lang u Bah Cyril Maring Rangbah Shnong, Bah Celestine Syngkli Headmaster, ki nongïalam ka CoRP hapoh ka jingïalam u Bah Roland Lyngdoh President ka Nongpoh Circle bad kiwei kiwei.
Haba kren ha katei ka sngi naka liang u Bah Roland Lyngdoh President ka CoRP Nongpoh Circle u la pynpaw ba ka daw ba ka seng kala jied ïa katei ka shnong ka dei namar ba katei ka shnong ka dei kaba pawnam halor ka jingdon ka krem lymbit kaba la tip ruh kum ka Pnah kyndeng bad donkam ban pynneh pynsah ïa ki khlaw ki btap ban sumar ruh ïaka mei mariang bad katei ka sienjam ba ka seng kala shim ban leit thung dieng ka dei ruh shibynta ban rakhe ïaka sngi pynneh mariang kaba la ju rakhe haka 5 tarik Jylliew bad hakajuh ka por ka jingïaid lynti ba 25 snem jong ka seng ba kan sa kynjoh mynta u snem.
Naka liang ka seng kala ai khublei ruh ïaka tnad forest kaba la pynbiangïaki symbai dieng bad kumjuh ruh ka tnad Wildlife kaba la phah ïaka kyrwoh sha ka seng ban pynpaw ka jingsngewkmen halor ka jingshim ïaka sienjam ban thung dieng naka bynta ban pynneh pynsah ïaka mariang bad ban pynphriang ruh ïaka khubor ban kiar naka jingpyniap pathar ïaki mrad ki mreng bad ki jingthaw ba im baroh.
Ha katei ka sngi naka liang ki paidbah kila shim bynta shitrhem ban thung dieng harud ki sawdong sawkun jong katei ka shnong ban pynjyrngam ïaka mei mariang bad naka liang ka seng kala ioh ruh ban sam ïaki musari sha ki longiing ba duk ha katei ka shnong.