Sniew dur ka synshar khadar ba mih pyrthei ki nongkhaïi heh spah tang ban ïoh bat ïaka bor bad burom : Albert Maring

Nongpoh, Jylliew 04: Ka kam nongmih khmat ka dei ka kam kaba khia donkam ban ioh ki nongmih khmat kiba kynsai, kiba stad, kiba kiba shem phang, kiba proh jabieng, kiba sngew thuh ïa ka jingeh jingjynjar jong ki paidbah, kiba iohi jngai ban thaw ki aiñ bad ki policy trei kam ba pher ba pher kiba nud ban kren ban ïasaid ha poh ka dorbar thaw aiñ assembly ïa ki mat ki (issues) ba pher ba pher na ka bynta ka bha ka miat ka jing myntoi jong ki paidbah.
Ki nongmih khmat kiba don shisha ka jingkitkhlieh ban kit ban bah ka kam nongmih khmat (representative) kam dei ka kam kai ne ka kam khyllung khynnah kam lah ban long ba uno uno u ba don spah u lah ban long nongmih khmat da kaba shu thied ïa ki paidbah da ka pisa tang ban jop elekshon.
Hynrei ha kine ki sngi mynta kiba bun ki nongkhaii heh spah (businessman) ki la mih pyrthei ban ïa leh elekshon namar ka jingthmu bad ka thong jong ki ka long ban ioh bat ïa ka bor ka burom bad ban kamai spah ar shah lai shah ban pynheh shuh shuh ïa ka spah ka phew ka khaii ka pateng jong ki ym ba kin ai shisha kata jing shakri na ka bynta ki paidbah, ym ban kit ban bah ïa ka khia ka shon jong ki paidbah.
Ha kine ki sngi kiba bun ki nongmih khmat ki la kylla long tang ki nongsam skhim ki nongsam tiar paidbah (public distributors) namar ba kim sngew thuh ïaka jingmut nongmih khmat, lane nongthaw aiñ (legislator) ba kim tip ia ka aiñ namar ba ki dei ki nongkhaii kumba ha kine ki sngi bun ki ba ïaleh election ki bun ki heh spah da kaba shu khlieh dor bad thied im im peit peit ïa ki paidbah da ka pisa ha ka dor 500 spah 1000 shi hajar tang ban jop election.
Kane ka la ïalam bakla ïa ki paidbah kane ka jingleh ka pynduh ka khanglad bad ka pyniap noh ïa ka sur jong ki paidbah ha ka synshar khadar paidbah (democracy) namar ba bunsien ki paidbah kiba don ka jingthmu ban jied da ka mon ba laitluid da ka jingïeid ïa u ne ka nongmih khmat ki shah khanglad bad ki shah ïalam bakla noh ha kane ka rukom. Haba kren ïa kane kam shym mut ba ngi pyrshah ïaki ngi burom ïa u synniang u bynhei jong ki, maki ki don la ka bhah ka bynta ha ka im lang ka sah lang kumno ban kyntiew ban ïarap ban pyn bha ia ka im lang ka sah lang lyngba u synñiang u bynhei jong ki, hynrei ym ban knieh noh ne ban shim noh ïa ka bynta kaba ma ki kim lah kot bor.
Namarkata kum ki briew kiba la shai ngi donkam ban jied ki nongmih khmat, ki nongthaw ain, da ki briew kiba stad kiba shem phang kiba nud ban kren ban ïa said ha poh ka dorbar thaw aiñ ïa ki mat ba pher ba pher bad ki jingeh ki paidbah, ym ban shu long tang ki nongsam tiar paidbah, kane ka long ka kyrwoh na u Samla Albert Maring naka shnong Umdap Dumu, Ri-Bhoi District.