Ngim dei ban kynmaw ïa ka sngi pynneh pynsah tang ha 5 tarik u Jylliew, hynrei kan dei manla ka sngi

Mawkyrwat, Jylliew 04: Kum shibynta ban ïa snohktilang ha ka jingrakhe ïa ka sngi pynneh pynsah ïa ka mei mariang ne ka World Environment Day mynta ka sngi ka 4 tarik u Jylliew, 2022 ka shnong Pyndensakwang, South West Khasi Hills District ka la ïoh ban pynlong ka prokram thungdieng bad ha kajuh ka por ki la pynlong ruh ïa ka jingpynkhuid ïa ki sawdong sawkun bad ki rud ki kiar jong ka shnong ha ryngkat ka jingïasnohkti lang ruh napoh ka ophis jong ka Community Led Landscape Management Project (CLLMP).
Ha kaba ïa dei bad kane ka bynta, na ka liang ka shnong Pyndensakwang ka ju ïai kyntu bad ruh ki jingmaham ïa ki nongshong shnong bad ïa ki briew kiba ïaid ba ïeng lyngba ka shnong ba kin sngewbha ban sumar khuid ymdei ban bret pathar ïa ki jakhlia ha ki lynti synkien, ki surok hapoh shnong hynrei kaba donkam ka long ban ïa trei lang bad ka shnong khnang ba kan wanrah ïa ka khuid ka suba bad ruh ba kin lait na shibun ki jingpang jingshitom ba bun jait.
Shwa ban sdang ka jingthung dieng la ïoh ka jingkren pynshai na ki nongtrei napoh jong ka CLLMP na ka kong N. Bareh bad na u bah K. Lyngkhoi bad kumjuh ruh na ka shnong na u bah Amos Kharjahrin ha kaba ki la ong ba kumno ban pynsngewthuh shuh shuh ïa ki paidbah nongshong shnong halor ka jingkordor jong ki dieng ki siej bad baroh ki kynja ba im kiba don ha kane ka sla pyrthei, ba kim dei ban pynjot ïa ki namar ba ma ki ruh ki don ka jingim kum ma ngi ki briew, kumta ki don ka hok ïa kiba kin im laitluid ha kane ka pyrthei.
Shuh shuh ki la ong ruh ba kum ki briew kim dei ban kynmaw ïa kane ka sngi pynneh pynsah tang ha 5 tarik u Jylliew kaba la buh kyrpang kum ka sngi kyrpang ban thung dieng ne ban pynkhuid ïa ki sawdong sawkun hynrei ki dei ban rakhe manla ka sngi da kaba lehkhuid bad ban ñiewkor ïa ka mariang.
Ha kane ka sngi la ïoh ban ïa shimbynta shitrhem naduh ki tymmen, ki samla synrang bda kynthei bad ki khynnah jong ka shnong namar ki buh ïa ka thong kumno ban pynneh pynsah ïa ki dieng ki siej bad ïa ka khuid ka suba hapoh shnong, bad kumjuh ruh ban wanrah ka jingkylla ha ka mei mariang da kaba thung ïa ki dieng khnang ba kan long myntoi ym tang ïa ka mynta hynrei ïa ki longdien ki ban sa wan.