Jowai, Risaw 09: Ban ïada na ka jingshongkha khynnah bad ki kam thala, ka Khasi Students’ Union (KSU) Kupli Area Circle kala ïoh lad ban pynlong daka Awareness program halor ka phang “Child Related Issues” ha Iaw Pyngkat ha shnong Iooksi.
Ha kane ka sngi la ïadon lang daki sahep naki department bapher bapher naduh ka tnat District Child Protection Unit, ka Tnat ka Koit ka Khiah, ka Tnat Fire Service, kumjuh ruh la ïadonlang daki Waheh Shnong naki shnong bapher bapher ba don ha kane ka thaiñ, ki Village Organization, ki Asha, bad ruh la ïadon lang naki trai jong ki Resort ba don sha kane ka thaiñ.
Na ka liang u Bah Rikin Lamin ba mih khmat naka tnat Child Protection Unit ‘ula ong ba ka Office ka lah ban ai ka jingïarap bad ka jingïada ba pura naka bynta ki khynnah kiba shah lehbeiñ bad kiba shem lanot khamtam ïaki khynnah basah khunswet lane phi lah ban phone ruh ha u toll free number 1098 ban ïoh ka jingïarap naka office jong ki.
Lah ïoh ruh ka jingkren na u Valentine Gino Synnah ba dei ruh u Waheh Shnong ka Shnong Saphai ‘ uba la kren halor ka phang kaba ka KSU ka buh kadei kaba kongsan tam. Na ka Health department la ïoh jingkren da ka kong B. Kharjoh badei ruh i Head Educator ka tnat PHC Iooksi kala kyntu ïaki longkmie, khamtam haka por ba armet ba kim dei ban pep ban wan sha PHC ban ïoh ïaki injection ba bun jait ban ïada ïaki khunlung naka jingpang ba bunjait.
La ïoh jingkren ruh na u samla Leningrad Tariang ba bat ruh kum i General Secretary ka KSU West Jaiñtia Hills District haka jingkren ula ong “Wat khyrkieh ban kieng pla na khmat kieng shwa nadien, namar” ka jingpep skul ki khynnah haka rta ba dang rit ka pyllong ïaki ban shongkha kloi bad ym dei maki ba mad ïaka jingeh dei ki kmie ki kpa jong ki ba mad nyngkong ka jingeh, ula kren ruh shaphang ka jingdon ki resort jaka jngohkai pyrthei hapoh ka thaiñ, hynrei ula kyntu ïa ki trai ban phikir bha ban nym ailad ïa ki khun samla ban ïaleh ieit sha kitei ki jaka.
La ïoh jingkren ruh na ka samla Ladaplin Hayong i President ka KSU Women’s Wing WJHD, kaba ong ‘Ka Awareness program ba nyngkong ka sdang nala ïing”, ki kmie ki kpa ki dei ban lumlang ïaki khun ha kawei ka kamra.
Ka phang ba kongsan ha kane ka sngi la ïoh jingpynshai khambha na u District Child Protection Officer, S. Passah’ ha kaba ula ai shibun ki jingsneng ïaki khun samla kiba dang don haka rta ba hapoh 20 snem, ula ong bun sien haba ka kmie ka ïap u kpa u lah iehnoh ïa ki khun, haka jaka ban ri ban sumar ne ban ai ka jingïada pynban u phet, ula pynsngew shaphang ki aiñ ïa kiba kam sniew, kum ka POCSO act bad kiwei kiwei de ki aiñ.
