Nongstoiñ, Risaw 09: Na ka bynta ban kyntiew ïa ka kamai kajih jong ki nongdie jingdie ha sor Nongstoiñ, kiba shu shnong madan ba kynthup naduh ki nongdie jhur, doh, marbam, ki jaiñ ki nep ki soh bad kiwei kiwei, u bah Gabriel Wahlang MLA ka Nongstoiñ mynta ka sngi balang ka 9 tarik Risaw u la lum lang ïa ki ha MEOFED hall na ka bynta ban sam ïa ki jingïarap da ka pisa.
Ki ladon haduh shi spah sawphewsaw ngut ki nongdie jingdie kiba shu shong madan kiba ïoh jingïarap da ka song pisa kaba mar shiphew hajar uwei. Utei u nongmihkhmat u la ai jingkren sha ki paitbah bad u la pynshai ba ha ki snem ba la dep, namar ba um shym don ha ka liang synshar um shym la ïoh ban ai jingïarap ïa ki paitbah.
U la ong ruh ba ha ka jingsam jingïarap ha ka sien ba nyngkong u la ai da ki tin sop ïing bad ha kane ka jingsam jingïarap ha ka sien kaba ar, u la pyrshang katba lah ban shim kyrteng ïa ki nongdie jingdie kiba shu shong madan, namar ba u ïohi ba ha kaba kum kane ka por ba ka ïoh ka kot, ka kamai kajih bad ka ïew ka hat ka hiar ki nongshong die jingdie ki shem jynjar haduh katta katta.
U la ong ruh ba kito kiba shu shong madan lei lei ki sngew kit ram haduh katta katta bad ki shem jingeh kumno ban bsa ïa ki khun ki kti, kumno kin kyrshan skul ïa ki namar ka kamai kajih ka la hiar shaba palat. Kumta u la hap ban phai khmat bad kner kti ban ïrap bad wat la ka jingïarap ka long kaba rit hynrei u kyrmen ba ka la long ka jingmyntoi ïa ki.
U la pynshai ruh ba na ka bynta jong kito kiba la dep ïoh jingïarap da ki tin sop ïing, um shym la buh kyrteng shuh bad ruh na ka bynta kito ki bym pat don kyrteng, u la ong ba un sa pynïoh pat ha ka snem kaba bud. Namar ka samoi long nongmih khmat jong u ka dang sah sa saw snem. Kumta haduh ba kut ka samoi long nongmihkhmat, un sa ïaleh katba lah ban pynïoh jingïarap kumba u la leh ha kane ka samoi.
