Sam u MLA ka Jowai da ki Tablet sha ki nongtrei ASHA hapoh ka Thadlaskeiñ bad Laskeiñ Block

Jowai, Risaw 09: Kum shibynta ban nang pynkhlaiñ shuh shuh ha kam shakri ïa ka koit ka khiah, na ka liang ka ïing treikam jong u District Medical and Health Officer, jong ka West Jaiñtia Hills hynnin ka sngi 8 tarik kala pynlong da ka jingïalang hapoh District Library Auditorium, Mynthong, Jowai ban sam ïa ki Tablet sha ki ASHA kiba don hapoh ka Thadlaskeiñ C&RD Block bad Laskeiñ C&RD Block.
Ha kane ka jingïalang la don ryngkat da u MLA ka Jowai u Ma Wailadmiki Shylla kum u kongsan, u Deputy Commissioner, B.S. Sohliy, u DMHO u Dr. K Dhar,bad u Dr. H. Niang, BDO jong ka Thadlaskeiñ C&RD Block bad kiwei kiwei de.
U Wailadmiki Shylla haba ai jingkren u la ïaroh ïa ka jingtrei shitom jong ki ASHA ban ïarap ïa ki nongshong shnong kiba don ha kylleng sawdong sawkun jong ki shnong kumjuh ban pynsngewthuh ha ka liang ka koit ka khiah bad ka jingtreikam ki Scheme kiba ai jingïarap da ka sorkar.
U la ong ruh ban pyndonkam da kine ki Android Tablet kan long ka jingïarap shibun ïa ki ASHA ha ka liang ka kam sumar ha ka jingïadei ban ka koit ka khiah. Ula pynsngew ruh ba ka Thadlaskein C&RD Block ka don kawei ka Community Health Centre (CHC) bad lai tylli ki Public Health Centre (PHC) ïa kaba la kyrshan haduh 170 ngut ki ASHA.
Ka Laskeiñ C&RD Block ka don kawei ka Community Health Centre (CHC) bad san tylli ki Public Health Centre (PHC), kiba kyrshan da ki 100 ngut ki ASHA.