Ym don jingthmu shuh ka Congress ban khroh biang ïa u Dr. Mukul bad ka Kynhun

Shillong, Jylliew 3 : U Secretary ka AICC uba dei peit ïa ka jylla Meghalaya u Manish Chatrath u la ong mynta ka Sngi Thohdieng ba kam don kano kano ka jingthmu jongka Congress ban dang khot ne khroh biang ïa u Dr Mukul Sangma bad ka Kynhun jongu ban wan phai biang sha ka party.
“ Ngam tharai ba u President ka MPCC bad kiwei kiwei ki nongïalam ka party kin bna ïa kane. Kane ka dei ka khubor kaba ngi shu ïohi ha ki kot khubor bad kyndit ban ïoh sngew na phi” ong u Manish.
U Manish ula ïathuh ba ki san ngut ki MLA kiba shah sospon ha ka party ruh kim ju phone ne ïakren bad u. “ Lada ki kren ïa u Pala te kata ngam tip hynrei ngi la sospon ïa ki na ka party” ong u Manish.
U la ong ba ka AICC ka la pynkhreh ïa ki lynti ïaid jongka namar ka election ka la jan bad sa tang kumba 7- 8 bnai la hap ban ïamih madan noh. “ Kin da don ki khubor ban pynlyngngoh ne pynkyndit ïa ki briew namar ki don bun kiba kwah ban wan pynïasoh sha ka party Congress hynrei ïa mynta ngim pat kwah ban pyntip paidbah” ong u Manish.
U Manish ula ong ruh “ Ka Congress kam dei ka party kaba kwah ban pynhiar kput namar ïa kito kiba la mih ruh ngi kitbok ïaki. Ngim pyrshah ïano ïano ka shong haka mon jongki. Mynta ngi la nang pynkhlaiñ ïaka party, ngi don ki briew kiba tbit bad kiba don ka kyrdan lada ïa nujor bad kiwei ki party hak ane ka jylla.”
U ma Pala u la ong pat ba ka long kaei kaei kaba bakla ïa ki san ngut ki MLA ban ong ba ka Congress ka khlem ailad satia ïa ki. “ Namar ngi la dep ai da ka jignthoh ban pan jingpynshai na ki hynrei ki khlem jubab satia bad shu ïohi ha ki lad pathai khubor ba ki kren ba kin ym jubab da lei lei ruh sha ka Congress, hato kane kam dei ba ngi la dep ailad ïaki hynrei dei ma ki hi kiba kyntait” ong u ma Pala.
Ha kaba ïadei bad ka jingai tiket jongka party ïa ki kyrtong jongka bad kumjuh ruh uei u kyrtong Chief Minister jongka, u Manish ula ïathuh ba ka Congress kam pat rai ban ai tiket ïano ïano ruh bad kam pat rai ïano kan buh kum u kyrtong Chief Minister ha u 2023.
U ma Pala uba dei u MP bad President ka MPCC u la ong ba ul a rai ban ïakhun beit ïa ka election namar kum u nongïalam ka party u kwah ban ïalam nakhmat kum u kapten ha madan thma. Nalor kata u la ong ha kaba ïadei bad u kyrtong Chief Minister ka party kam ju rai lypa.
“ Nga ïa khun ïa ka election namar nga sngewthuh ba nga hap ban ïalam nakhmat kum u kapten ha ka jingïakhun khnang ba kan ai mynsiem ïa ki shipai jong nga. Nga kmen ba ka dei u MP hynrei ha kajuh ka por nga hap ban phai sha ka jylla ruh” ong u ma Pala.
U la ïathuh ba ula rai ban ïakhun hadien ba ki paralok ba jan eh bad u ruh ki la pynbor ïa u ban ïakhun.
U Manish u la ïathuh ba ka Congress ka la sdang ban bishar bniah ban jied ïa ki kyrtong bad kan jied ïa kito ki briew kiba thrang ban trei na ka bynta ka roi ka par jongki paidbah ym ki khwan myntoi shimet. U Manish u la ïada ruh ïa u ma Pala da kaba ong ba um dei ma u ka daw jongka jingphet seng ki MLA namar um dei na Delhi u dei na Meghalaya hi.