Shillong, Risaw 08: Ki samla kynthei bad shynrang kiba ïa khun ïa ka exam staff Nurse ki bym shym la mih kyrteng ha ki result khot kam Nurse, kila buh por ïa ka sorkar ba kan pynshai hapoh 24 kynta halor kine kynrum kynram ha ka rukom set jingkylli bad lada kim lah ban pynbeit ïa kane na ka liang jong ki, ki la dawa ban pynsangeh noh shwa ïa ka jingthung kam ha ka staff nurse bad ba ka sorkar kadei ban pynlong ïa ka jingtohkit kaba laitluid halor kane bad jia lada lap ba ki donkti ha kam leh thok dei ban pynshitom bad ban wengkam noh ïa ki katkum ki kyndon ka aiñ.
U Samla Lurstep Nongrum bad ka samla Banisha Pyngrope haba kren sha ki lad pathai khubor ki la iathuh ba ki la shem ba ki khlem la mih kyrteng mynta ka 8 tarik Risaw 2024 ki la leit ban buh jingthoh sha ka ophis ka DHS (MI) ba dei ruh ka Meghalaya Medical Service Recruitment Board (MMSRB) ban dawa na ka bynta ban pynshai ha kaba ïadei bad ka rukom set jingkylli na ka bynta kane ka kam staff nurse kaba dang shu dep shen.
Shuh shuh ki la pynpaw ruh da kaba ong ba ka DHS kadei ban pynshai halor ka jingdon ka jingbym pynmih kyrteng ïa kiba ïoh 70 mark shaneng ha ka 2nd list katba ha ka 3rd list pat ki mih kyrteng.
Kine ki samla ki la ïathuh ruh ba ki don 28 ngut kiba ïoh 70 marks shaneng hynrei la pynmih kyrteng pat tang 22 ngut.
Kine ki samla ba ïakhuh staff nurse ki bym shym mih kyrteng, kila pynpaw bad ong ba kim bishni ne pihuiñ ïa kito kiwei pat ki samla kiba mih kyrteng bad pass ïa ka exam kiba la dawa ba ka tnad ka dei ban khot pynkloi bad ïaid beit shakhmat, hynrei kila ong ba ka hok jong ki kadei hok ban ïoh u soh ba ki pass bad ka hok jong kiwei pat ki samla ki bym mih kyrteng ki don hok ruh ban ïoh jingshai ym ba kila pass kim ñiew shuh ïa kiwei kiba shah leh thok.
