Shillong, Risaw 08 : Hynriew ngut ki dkhot jong ka All Meghalaya Traditional Wrestling & Pankration Association ki la ïoh ban khur takma na ka rynsan ïakop jong ka ‘12th Traditional Wrestling & Pankration Championship 2024’, ka lympung dang shu kut shen, ba la long ha Multi Purpose Maharana Pratap Indoor Sports Hall, Dehradun, Uttarkhand.
ïa kane ka rynsan ïakhun la pynlong da ka Uttarakhand Traditional Wrestling & Pankration Association ha ka jingïatreilang bad ka All India Traditional Wrestling & Pankration Association (AITW&PA) ba la lamkhmat da u Omar Tamboli na Pune, Maharashatra kum u President.
Lah ban kdew ba ka AITWPF ka dei ka dkhot jong ka International Mas-Wrestling Federation (IMWE) bad ka International Federations bad ka dkhot kaba la pynïasoh bad ka United World Wrestling (UWW).
Ka jingïalehkai AITWPF ka kynthup ïa ka Traditional wrestling jong ki ri bapher bapher ha ka pyrthei, kum ka Alysh (Belt Wrestling) – Qazakh Kuresi – Pankration Athlima – Pankration- Palesmata –Polydamus – Khapsagai – Mas Wrestling.
Na ka liang jong ka AMTW&PA ka la ai khublei ïa ki nongïalehkai kiba la wanrah bad khur haduh 16 tylli ki takma, ba kynthup ïa 5 tylli ki takma ksiar, 6 tylli ki rupa bad 5 tylli ki rnong.
Kine ki nongïalehkai kiba khur takma ki dei na East Jaintia bad East Khasi Hills hapoh ka jingïalam u Chairman ka MSMA bad nongseng ïa ka jingïalehkai ‘Traditional Wrestling’ ha Meghalaya, Bah Donny Ranee.
Ki nongïalehkai kiba la khur takma ki kynthup ïa: u Salmi Phawa (3 tylli ki takma ksiar bad kawei ka rnong, ka Kongka Dkhar (2 tylli takma ksiar bad kawei ka rupa), u Joply Sana (2 tylli ki takma rupa), u Banteiboklang Songthiang (2 tylli ki takma rupa), Nangkitboklang Songthiang (2 tylli ki rnong bad kawei ka rupa) bad u Fibeststar Songthiang (2 tylli ki rnong).
Ka President jong ka AMTW&PA, ka Kong Anita Songthiang ka la pynbna ba ka jingpyrshang jied nongïalehkai lane ka ‘Selection Trail’ yn pynlong biang ha Delhi na bynta ka ‘All Belt Wrestling Winner’ ha ka 19 haduh 23 tarik Risaw, 2024 ban jied ïa ka kynhun ka ban mihkhmat ïa ka ri sha ka Asian Belt Wrestling Championship ban long ha u Naiwieng 2024 ha Kohima, Nagaland.
Hadien ba ki nongïalehkai ka jylla ki la ïoh ban khur kawei ka takma rupa bad 2 tylli ki rnong ha ka thup ïakop jong ka ‘Belt Wrestling’ ha ka North East Olympic Games’ ba la long ha Nagaland.
Ka la buh jingkyrpad ruh ïa ka tnat Sport jong ka Sorkar Jylla bad na ka MSOA ban kynthuplang ïa kane ka jingïalehkai ha ka Meghalaya Games ka ban sa long ha West Jaintia Hills District halor ka nongrim ka jingseisoh ha Nagaland. (Ka hok bad ym kano kano ka jingsngew shiliang khmat ha ka mynsiem ïalehkai Sports bad ka jingroi jong ka) na bynta ki nongïalehkai Wrestling ka Meghalaya.
Ka la pyntip ruh ba ka Traditional Wrestling (Belt Wrestling) ka lah ban shah pynrung ha ka National Games haUttarkhand.
