Jowai, Risaw, 05: Ki bynta jong ka surok ba khun ha ka shnong Mookyndur, West Jaiñtia Hills District kaba la wanrah ïa ka jingsah kut ki kali heh na ka por sha ka por bad ka jingkylla jong ki trok ki bym lah shuh ban tehlakam ynda poi ha kane ka jaka ba khun bha.
La sakhi ruh hynnin ka sngi Thohdieng ka la don ka jingsahkut jong kali ha kane ka bynta tang na ka daw ka jingsniew jong ki ar tylli ki trok heh kiba thmu ban jam ïa ka surok kaba khun nalor ka jingsniew shaba palat jong ka surok.
Kane ka la buh jingeh wat ïa ki Pulit ban pynlait ïa ka jingshakut jong ki kali kat haduh ba ka tnad Pulit ka la kyntu ïa ki paidbah nongleit nongwan na Jowai-Shillong-Guwahati ban ïaid noh na ka surok Nartiang-Bamkamar ban kham shngaiñ ka leit ka wan.
La sakhi manla u snem ka Sorkar ka la pyrshang ban maramot ïa ka surok bah NH-6 Jowai- Shillong, hynrei kam shym la ïohi ïa ka jingeh kaba mih man ka por na ka jingkhun palat jong ka surok ha Mookyndur bad kaba la buh jingeh khamtam ïa ki kali heh.
Lada ka Sorkar ka long kaba ïohi jngai lyngba ka tnad PWD ka ladei ban shim noh ïa ka sienjam ban pynduna noh ïa ka jingkhun palat ka jaka da kaba ot pynbeit noh ïa ka bynta ba don u lum lane ban wad lad da kumwei pat.
Kumba la ïohi mynta ka ladei ka por ban shna pynthymmai noh ïa ki bynta jong ka surok khamtam ha kito ki jaka ba khun, khnang ban lait na ka jingeh ïa ki kali heh kiba kit ïa ki mar kiba khia.
Ka jingsahkut jong ki kali da ki bun kynta ka la buh jingeh ïa ki paidbah nongleit nongwan kiba donkam ban poi kyrkieh sha jaka ba donkam. Kumta ka Sorkar ka ladei ban peit jngai ïa kane ka jingeh jong ki babun ba lang da kaba leh ïa kaba donkam na ka bynta ka jingmyntoi jong baroh.
Ka surok NH-6 (Jowai-Shillong) ka dei kaba pynïasoh ïa kiwei ki jylla jong ka thaiñ Shatei Lammihngi jong ka ri kiba kynthup ïa ka jylla Assam, Manipur, Mizoram, Tripura nalor kiwei.
