Shillong, Risaw 05: Ka Meghalaya Pradesh Congress Committee (MPCC) ka la pynlong da ka jingai jinghikai kaba lai sngi na ka bynta ki samla ba don sap jong ka jylla ïa kaba la pynhap pyrda noh ha kane ka sngi Saitjaiñ.
Ïa kane ka jinghikai la ïalam da u Dr A. Chellakumar, na ka All India Congress Committee bad u Adv Mathew Antony, Joint Secretary ka AICC ryngkat ka jingkyrshan lang da u President ka MPCC u Vincent Pala, kumjuh u MP ka Tura u Saleng Sangma, ong ka kyrwoh na ka Party.
La ïathuh ba na ka liang u General Secretary ka MPCC u Sanjay Das bad ruh u Manuel Badwar Secretary kaPCC ki la shim bynta lang ban ai jinghikai ïa kitei ki samla ryngkat bad ki nonghikai ba la khot kyrpang.
Lyngba kane ka jinghikai ki samla ki la ïoh ruh ïa ka lad ban pyntbit ha ka jingïadei para briew, ka jingkren paidbah, ban pyntbit ha ka social media bad ruh halor ka ïoh ka kot bad khamtam eh haba ïadei bad ki jingtip shaphang ka aiñ.
“Ngi la rai ruh ban ai ïa kane ka jinghikai wat ïa ki President jong ki District Congress Committee bad Block Congress Committee halor ka jingpynkhreh na bynta ka elekshon ban wan,” la bynrap biang ka kyrwoh.
