Jowai, Risaw, 05: U Symbud Myntri Rangbah ka Sorkar Jylla u Bah Sniawbhalang Dhar ha ka sngi Thohdieng u la leit jurip ïa ka Namdong CHC ryngkat ka jingsynran lang jong u Waheh Shnong u Bah D.S. War, u Secretary Shnong u Bah Serus Lipon, ki nongïalam shnong bad ki riew rangbah jong ka thaiñ.
Ha kane ka jingjurip u Symbud Myntri Rangbah u la ïohlad ban ïakynduh ïa ka Dr. Arda Laloo kaba peit ïa ka Namdon CHC bad ïa ki doktor kiba trei ha kane ka CHC.
Ka Dr. Arda Laloo ka la aiti ruh da ka ka jingthoh sha u Symbud Myntri Rangbah ïa ki jingduna bad ki jingdonkam jong kane ka CHC bad la ïa mir jingmut lang hapdeng ki nongtrei ka CHC ki nong ïalam shnong bad u Symbud Myntri Rangbah uba dei dei ruh u MLA jong ka Nartiang Constituency na ka bynta ban pynbha bad ban pynbiang ïa ki jing donkam ha ka CHC.
U Symbud Myntri Rangbah u la kular ban shimkhia na ka bynta ban pynbiang bad ban pynbha ïa ki jingdonkam ha kane ka CHC naduh ki doktor ki Staff Nurse bad kiwei kiwei ki nongtrei.
U la kular ruh hakhmat ki doktor, ki nongïalam shnong ba un shna noh da ka surok rong ban poi sha CHC, ban pynïoh kawei kali Ambulance, ban ai rong noh ïa ka Building bad baroh ki Quater jong kane ka CHC.
Shuh shuh u la kyntu ruh ïa baroh ki nongtrei ba kin treihok bad ba kin don ha ka kamram bad ban ai ka jingïatreilang hapdeng ka CHC bad ki bor synshar shnong khnang ba kan wanrah ïa ka jingmyntoi ïa ki paidbah baroh kawei ka thaiñ.
Hadien kane ula leit jngoh ruh ïa ka jaka na ka bynta ban shna ïa ka ophis jong ka Namdong C&RD Block bad u la ïathuh ruh ba yn pyntreikam pura ïa ka Namdong Block khnang ba ki paidbah kim donkam shuh ban leit sha Thadlaskeiñ C&RD Block hynrei ki shnong kiba hap hapoh Namdong C&RD Block kin lah ban pyndep ïa ki kam hapoh ka Block la jong.
