16 tarik Risaw yn sdang ïa ka OC Blue Shillong Premier League 2024

Shillong, Risaw 04: Ka lympung ïalehkai phutbol ‘OC Blue Shillong Premier League’ na bynta u snem 2024 kan sdang naduh ka 16 tarik Risaw.
Ki 10 tylli ki kynhun ban ïakhun mynta u snem ki long ka lahduh jong u snem ba ladep- ka Mawlai SC, ka kynhun ba wan ba ar (runners-up 2023) – ka Rangdajied United FC, ki ar kynhun ba khyllem noh ha ka semi final jong u snem 2023- ka Shillong Lajong FC bad ka Langsning FC, Ryntih FC, Sawmer SC, Nongthymmai SC, Nangkiew Irat SC bad ar tylli ki kynhun ba la kiew kyrdan na ka First Division 2023 – ka Nongrim Hills SC bad ka Laitkor SC.
Ka OC Blue ka la wanphai biang kum ka nongbei tyngka mynta ka samoi bad ha ka Sngi Thohdieng u Bah Banteidor Lyngdoh-President ka SSA, u la pynbna paidbah ba ka pisa khusnam kan long ar shah ha kane ka samoi, kata haduh 6 lak tyngka na bynta ka lahduh. Ka kynhun ba wan kyrdan ba ar kan ïoh ïa ka song khusnam kaba 3 lak katba baroh ki klob kin dang bteng ban ïoh ka bhah na ka khajna tiket.
Mynta u snem ka SSA ka thmu ruh ban pynlong ïa ki katto katne ki jingïalehkai ha ka por miet (da kaba tbeh jingshai da ki floodlight) ha madan First Ground, khnang ban pynsngewtynnat ïa ki nongkyrshan.
Ka jingkhmih lynti ka long kaba jur ïa kaei kaba la kular ban long ka jingïalehkai kaba itynnat bad kaba shongshit bha hapoh ka jylla kaba la bnanam namar ka jingieid jong ka ïa ka phutbol bad kaba don bun ki nongialehkai kiba tbit. ïa ka trophy kaba la ap khmihlynti la plie paidbah ha ka jingdon ryngkatlang ki 10 ngut ki kapten jong ki kynhun ki ban ïashimbynta.
“Ka OC Blue ka sngewkmen ban ïatreilang bad ka Shillong Premier League ban kyntiew ïa ka roi ka par ha kam ïalehkai phutbol ha ka jylla Meghalaya. Ngi kyrmen ba kane ka jingïatreilang kan ïarap ïa Ngi ban sei ïa u rangïalehkai ba kynsai ha ka phutbol India na Shillong,” la ong u Vineet Grover, Sales Director – East for Allied Blenders and Distillers jong ka OC Blue.