Shillong, Risaw 04: Ka kynhun ïalehkai kriket ki thei ka Nagaland bad Sikkim kin sa ïakynduh pyrshah ha ka final jong ka lympung 1st Senior Women’s Interstate Friendship T20 Tournament mynta ka Sngi Saitjaiñ. Kane ka lympung la pynlong da ka North East Cricket Development Council bad pynïaid da ka Meghalaya Cricket Association.
Ki ar tylli ki jingïakhun semifinal la hap ban pynkynriah bad pynlong ha ka Sngi Thohdieng, ka sngi ba la shim rai lang, ha Pahamsning Cricket Ground, hynrei ka jingbteng jong u slap kam shym la ailad ban pynlong pura ïa ki jingialehkai.
Related Posts
Ha jaka jong kane, ka jingïakhun ïa ka semifinal kaba nyngkong hapdeng ka Meghalaya bad ka Nagaland la rai lyngba ka ‘Bowl Out’, ha kaba ki nongkawang-bol jong baroh arliang ki la shim ïa ka bynta bad pyrshang ban pynkhyllem ïa ki stump kiba don sha shiliang tduh na jaka ba kawang ïa ka bol. Ka jingïakhun ka long kaba jur bad kaba pynsyier mynsiem ha ki katto katne minit ïa baroh arliang hynrei ha kaba khadduh ka Nagaland ka la lah ban lamkhmat da 2-1 ban rung sha ka wat ïakhun na bynta ka trophy.
Katba ka jingïakhun ïa ka semi final kaba ar hapdeng ka Sikkim bad ka Manipur la hap ban shim rai lyngba ka ‘Super Over’. Ka jingtbit jong ka Pranita Chettri ha ka bol bad ka jinglah ban tehlakam ki thei ïalehkai ka Sikkim ban khanglad ïa ki bol ban tyllun jngai ka la pynlong ïa ka Manipur ban kynjoh tang 6 ron. Haba beh ïa kane ka thong, ka Samayita Roy Prodhan ka la tied ïa pura ïa ka ron ba ka Sikkim ka donkam, kynthup kawei ka boundary, da tang saw bol.
Kine ki kynhun kiba la poi sha ka final ki la dep ban ïakynduh teng shisien ha kane ka lympung namar baroh ar ki dei ki kynhun na ka Group B. Ha ka jingïakynduh jong ki ha ka group stage, ka Sikkim ka la lah ban pynliem ïa ka Nagaland da 4 wiket. Kumta kane ka long ka kabu ïa ka Nagaland ban kput kylla ha kaba baroh arliang kin ïakhun tyngeh ban long ka lahduh ba nyngkong jong kane ka lympung NECDC Senior Women’s Interstate Friendship T20 Tournament.