Khliehriat jylliew 3: Kum shibynta kum ka jingnoh syniang lem sha ka imlang ka sahlang Ka Khasi Students Union East Jaiñtia Hills District Unit kan pynlong ïa ka jingsam dawai ei sha ki paidbah ha kaba ki doctor kiba paw jong ka Downtown Hospital Guahati ba kynthup ki doctor ENT, Gynaecology, Paediatric, Oncosurgery bad kiwei kiwei kin wan ban leh ïa ka medical checkup bad ïa ki dawai ruh ym sam ei sha ki paidbah.
U General Secretary KSU East Jaiñtia Hills District Unit, u bah K.S.Suchiang u la bynrap shuh shuh ba kane ka long ruh kum ka lad ban ïarap ban kyntiew shuh shuh ïa ka koit ka khiah ha ka imlang ka sahlang hapoh ka District bad ong ba ka seng ka khot bad wer ïa baroh ba kin wan sha kane ka jingsam dawai ei kaba yn pynlong ha ka 11 Tarik u jylliew 2022 ha Khliehriat West Community Hall ka ban sdang naduh ka por 9 baje mynstep haduh 2 baje janmiet.
Na ka liang ka seng ka khot bad wer ïa baroh ki paidbah ba kin wan ban shim ïa kane ka kabu ban wansha katei ka Free Medical Camp lane ka jingsam dawai ei kaba yn sa pynlong da ka seng ha Khliehriat West Community Hall.
Ha kajuh ka por utei u nongialam jong ka KSU na East Jaiñtia Hills District u la pynpaw ka jingsngew khia halor ka jingbym bit bym biang bha ki tiar ai jingsumar ha Khliehriat Civil Hospital bad kyntu jur ïa ki bor ba dei peit ba kin sngewbha ban shim khia ban pynbiang bha ïa ki tiar ai jingsumar khnang ba kan pynskuk ïa ki doctor, ki nurse ban ai ka jingshakri ïa ki paidbah ka thaiñ khnang ba ki ba pang ba shitom ki ioh ïa ka jingsumar kaba paka na katei ka hospital, namar kumba paw mynta ha katei ka hospital ha Khliehriat ki dang don shibun bha ki tiar ai jingsumar kiba dang duna, kumta ka seng ka kyntu jur ïa ka sorkar bad kumjuh ruh ïa ka tnat ka koit ka khiah ba kan shim khia bha halor kane ka bynta.
