Nongpoh, Jylliew 03: Hadien ba u lapbah ba jur u la ther mynta ka sngi bad neh bun kynta haki bynta jong ka thaiñ Jorabat ha Ri-Bhoi, bun naki paidbah nongleit nongwan bad kumjuh ruh ki dukan kila shah ktah naka jingshlei um bad shah tap ruh haka umktieh kaba neh ha katei ka jaka.
Katei ka jingther u lapbah kaba la wanrah ruh ka jingshlei um kaba jur ha katei ka jaka bad bun naki nongleit nongwan kila sahkut namar ka jingheh jong ka um kaba la wanrah ruh ka jingdheng kali khamtam ki kali rit bad tang ki kali heh kiba lah ban ïaid namar ka jingkhlain jong ka um.
Kum ban shu pynpaw ba ka jingshlei um ha katei ka jaka kam dei shuh ka sien ba nynkong ba ki paidbah ki mad jingeh naka por shaka por naduh ki nongleit nongwan, ki nongshong dukan ba ki paidbah kim ioh shuh ban ïaid lyngba katei ka surok namar ka jingshlei um.
