Shillong, Jylliew 03: Ka HYC Shillong City ka la ong ba kiba bun ki kmie ki kpa ha kine ki sngi ki ud bad ki thnum ba ki khun ki kti jong ki kim ïoh kam ïoh jam, katba ïa ki dukan jong ki pat, khamtam ha ïewduh ki aiwai sha ki bar jylla.
Ki nongïalam ka Seng, kynthup ïa u President u Bah John Lyngdoh bad u Samla Enlang Sawian, Secretary, haba ïakren bad ki nongthoh khubor, ki la ong ba ha ka jingshisha ka jingïoh laisen khaïi ki bar jylla, kadei namar ba ki ïoh dukan ban wai na ki trai jylla hi. “Kane ka rukom leh kadei kaba ki ong ka leh benami kaba long pyrshah ïa ka aiñ”, la ong u Bah John.
Ka Seng ka ong ba ka jingïoh ban wai ki bar jylla ïa ki dukan ka long ka jingpynduh kam ïa ki samla bad ïa ki paidbah trai ri trai muluk.
Ka Seng ka kyntu ïa ki trai jylla ba kim dei satia ban aiwai sha ki bar jylla ïa ki dukan, hynrei lada kim lah ban shong hi, kidei ban ai sha ki khun ki kti ne kiba haïing hasem jong ki lane sha ki para doh para snam la jong.
Ha kajuh ka por, ka Seng ka la ïakynduh ruh ïa u EM ba dei peit ïa ka Trade, u Bah Robert Kharbuki ban kyntu ïa u ba ym dei ban shu ai laisen khaïi pathar, khnang ban teh lakam ïa ka jingïoh khaïi ki bar jylla hangne. U Bah John, u la ïathuh ba na ka liang u Bah Kharbuki, u la ïathuh ba kiba bun hi ki laisen khaïi ba ka District Council ka ai, kidei kiba ki la ïoh lypa ïa ka NOC ne ïoh jingbit na ki Shnong, na ki Syiem bad ka buh jingeh ïa ka Council lada kam ai. Ka daw ka long ba lada la biang ki NOC bad kiwei ki jingdonkam ba ki Shnong, ki Hima kine ki ba pan laisen khaïi ki leit sha kiwei pat kibor, ïa kaba ka District Council kam lah ban leh eiei.
Ha kajuh ka por ka HYC ka la ong ruh ba kan sa pynlong ka jingkhynra laisen khaïi ha nongbah Shillong ban thwet ïa kito ki dukan bar jylla ki bym don laisen ban khaïi bad ha kaba ïadei bad kane, ka la pan ruh ïa ka jingïatreilang jong ka District Council.
