Jowai, Jymmang 03: U Deputy Commissioner (Supply), West Jaintia Hills ula pyntip ba ïa u khaw rashon NFSA (AAY bad PHH) bad u Non-NFSA hapoh ka skhim PMGKAY na ka bynta u bnai June, 2022 la dep ban pyllait sha baroh ki wholesale na ka bynta ban pynpoi sha baroh ki dukan die rashon haduh ka 15 tarik mynta u bnai.
Ka bhah khaw Antyodaya Anna Yojna (AAY) yn sam ha ka jingthew kaba 35 kg kawei ka AAY FI Card ha ka dor T.3/- na ka bynta kiba shong ha sor bad ha nongkyndong.
Ka bhah khaw Priority Household (PHH) yn sam ha ka jingthew kaba 5 kg shi khlieh ha ka dor T.3/- na ka bynta kiba shong ha sor bad ha nongkyndong.Katba ïa ka bhah jong u khaw Non-NFSA kan long 7.215 kg shi khlieh ha ka dor kaba la buh da ki Vigilance Committee ka bym dei ban palat ia ka dor T.14/- shi kilo na ka bynta kiba ha sor bad nongkyndong.
Ïa u khaw PMGKAY- Antyodaya Anna Yojna (AAY) yn sam ha ka jingthew kaba 5 kg shi khlieh shi bnai khlem da donkam siew dor la ha sor na nongkyndong. Ïa u khaw Priority Household (PHH) yn sam ha ka jingthew kaba 5 kg shi khlieh shi bnai khlem da hap ban siew dor la ha sor ne nongkyndong.
U Deputy Commissioner (Supply) ula kyntu ïa baroh ki dukan die rashon (Fair Price Shop dealer) ba kin sam pyndep ïa u khaw hapoh ka 30 tarik u June, 2022 da kaba pyndonkam da ka e-Pos machine.
