Nongpoh, Jylliew 03: U Bah Sosthenes Sohtun MLA ka Jirang Constituency mynta ka sngi u la ai ka jingkhublei ba kyrpang ïaki paidbah ka them Ri-Bhoi naduh ki nongïalam barim kiba la pynioh ïaka district ba pura ha u snem 1992 ba ka Ri-Bhoi District kan kynjoh 30 snem ka jingïaid lynti ha ka 4 tarik Jylliew.
Haba kren sha ki lad pathai khubor mynta ka sngi naka liang u Bah Sosthenes Sohtun u la pynpaw ka jingburom bad sngewnguh ïa baroh ki nongïalam barim kiba la don bynta ban pynioh ïaka district naduh u Dr DD Lapang, bad kiwei kiwei khlem da klet ruh ïaki nongïalam barim ba kynthup ïa u Bah JD Rymbai (bam kwai ha dwar u Blei), Fr Sylvanus Sngi Lyngdoh bad kiwei kiwei khlem da klet ruh ïaki nongïalam bad ki nongmihkhmat ba mynta naka them Ri-Bhoi.
Naka liang u bah Sosthenes Sohtun u ai khublei ïa baroh ki paidbah ka them Ri-Bhoi kaba la don hapdeng shibun ki jingkylla bad sdang kiew ruh haki liang baroh bad ai ba ki nongïalam kin dang ioh ka met ka koit ba khiah bad ka jingstad ban dang lah ban dang wanrah shuh shuh ki jingkylla bad ba ka district kan dang kiew shaphrang ha baroh ki liang.
