Shillong, Jylliew: Ka National Health Authority (NHA) ka la ai ka jingïaroh ïa u Symbud Myntri Rangbah ka Jylla bah Prestone Tynsong bad ïa u Director ka Tnad ka Koit ka Khiah (DHS) Dr Aman War halor ka rukom pyntreikam ka Jylla ïa ka Meghalaya Health Insurance Scheme (MHIS) bad ïa ka PM-JAY.
U Chief Executive Officer ka NHA R.S Sharma ula phah da ka shithi ba kyrpang sha ka Jylla halor ka jinglah ban pynïaid bha ïa ka review meeting jong ka Ayushman Sangam ki Jylla ka thaiñ Shatei Lam Mihngi ba long myn ha ka 23 bad 24 tarik Jymmang ha Nongbah Shillong kaba ïakren halor ka jingtreikam ka Pradhan mantri – Jan Arogya yojana (PM-JAY) bad ka Ayushman Bharat Digital Mission (ABDM).
Une u Heh ka NHA ula ïaroh ruh ïa ka sienjam ba ka Jylla kala shim ha kaba kynthup ïa ki out patient service bad preventive care hapoh ka MHIS kaba la pyntreikam ha ka jingïaklop lang bad ka PM-JAY.
U Sharma ula ai khublei ruh ïa ka Jylla halor ka jingthaw ïa ki Village Health Council kaba long kum ka kynhun ba khmih ïa ka Koit ka Khiah ha ki Shnong ki thaw.
Ula kyntu ruh ïa ka sorkar ba kan wad ïa ki lad ki lynti ban pynïasoh ïa ki Village Health Council bad ka PM-JAY khnang ka NHA kan rah ïa ka nuksa Sha kiwei pat ki Jylla jong ka ri.
