200 tylli ki tynrai dieng la thung ha Tynrong Jakrem shwa ka taïew rakhe pynneh mariang

Mawkyrwat, Jylliew 03: Kumshibynta jong ka rakhe ïa ka sngi pynneh pynsah ïa ka mariang ne ka World Environment Day bad kumjuh ruh ka World Environment Week, ka ophis jong ka Divisional Soil & Water Conservation (DS&WC), South West Khasi Hills District, Mawkyrwat mynta ka sngi ka la pynlong prokram jingthung dieng kaba dei halor ka phang pdeng, “Tang kawei ka pyrthei” ha Tynrong (Synrang Syiem) Jakrem, South West Khasi Hills District ha kaba u Additional Deputy Commissioner jong ka South West Khasi Hills District, Mawkyrwat, bah S.C. Laloo, u la long u kongsan.
Ha kane ka program thung dieng watla ka la don ka jingpynthut na u slap hynrei la wan ïashimbynta shitrhem naduh ki khynnah skul, ki nonghikai, ki nongïalam shnong jong ka shnong Jakrem bad kumjuh ruh ki nongtrei jong ka ophis jong u Divisional Soil & Water Conservation, South West Khasi Hills District ha kaba la ïoh ban pyndep ïa ka jingthung dieng haduh 200 tynrai ki dieng bad nangne shakhmat ruh ha kane ka juh ka jaka ynsa thung biang ïa ki symbai dieng kumba la dep ban mang.
U bah bah S.C. Laloo ha ka jingkren u ong ba kane ka prokram thung dieng ka long shibynta jong ka jingrakhe ïa ka taïew jong ka mariang ha kaba ki briew ki dei ban sngewthuh halor ka jingkordor jong ka jingdon jong ki dieng ki siej, ki sim ki doh, ki mrad ki mreng kiba pynphuh ïa ka mariang kaba long katkum ka jingbuh beit buh ryntih U Blei. Namarkata, u la pynsngewthuh ba ka jingdon jong ki dieng ka lah ban ïada ban pynneh pynsah bad ban wanrah biang ïa ka jingitynnad ka mariang kaba u briew u la pynjot lyngba ki jingleh jingkam jong u.
Shuh shuh u la ong ba ki don shibun ka jingkylla ha ka jinglong ka mariang kaba lah ban ktah lada kim leh ei ei ha ka ban sumar ban ri bad ban ïada ïa ka mariang. U la pynkynmaw ba ki dieng ym tang ba ki lah ban ïada na ka jingtuid noh ka khyndew hynrei wat ban ïarap kjit noh ïa ka jaboh kaba don ha ka bad ban pynjyrngam biang ïa ka mariang. Kumta u la pynshlur ïa ki nongshong shnong ban thung bun ki dieng kiba lah ban ïarap ban pynneh ïa ki tyllong um dih bad ka jingsboh jong ka khyndew, ban ïada ïa ki jingthung jingtep bad ha kajuh ka por kan long ka jingkyrkhu bad ka spah bah ïa ngi u khun bynriew lada ngi shim khia ha kaba peit ba ka nym don ka jingleh pathar hynrei ban ïa im bad ïaid ryngkat ryngkat bad ka mariang bad kiei kiei kiba don ha ka.
U bah O. Khardewsaw, Divisional Soil & Water Conservation Officer (DS&WC), South West Khasi Hills District ula ong ba ka jingthmu jong ka jingrakhe ïa kane ka sngi ka long ban pynshlur ban thung da ki dieng ha ki jaka kiba la pynduh, ka jaka bym seisoh shuh bad ba la iehnoh shrah khnang ban ïada na ka jingtuid noh ka sboh khyndew lyngba ka jingtih pathar ïa ki marpoh khyndew bad kiei kiei kiba don hapoh jong ka bad ha kajuh ka por ka jingdon jong ki dieng ka pynneh pynsah ïa ki tyllong umdih bad kjit noh ïa ki jaboh kiba don ha ka mariang.
U la pynkynmaw ruh ba kum ki nongshong shnong ki dei ban kynmaw ban sumar bha ïa ka mariang kaba ri kaba kdup, kaba bsa ba pjiah namar u briew u ïa im ryngkat ryngkat bad ka mariang.
U Dr. E. Khongjoh, District Animal Husbandry & Veterinary Officer (DAH&VO), South West Khasi Hills District haba u la ai jingkren ha kane ka sngi u la pynkynmaw ba ka um bad ka lyer ki long ki ar tylli kib akongsan tam ha ka jingim u briew ha kaba u briew un ym la im lada ymdon kine ki ar tylli ki bynta. Namarkata, u la pynsngew ba ka por ka la dei ba ngin pyrkhat kumno ban ïada bad ban pynneh pynsah ïa ka mariang khnang ba ki tyllong um kin neh bad ba kin ïoh ban ring mynsiem ïa ka lyer bad ban ïoh dih ïa ki um kiba khuid kiba suba.
Ka St. Michael Upper Primary School, Pyndenspar, Jakrem ka la ai ïa ka jingrwai pdiang katba u samla Hardine Wanniang bad ka kynhun ki la ai ïa ka jingrwai ‘theme song’. U bah N. Wanniang, Range Officer Mawkyrwat Range Office, uba pynïaid ïa ka jingïalang ula ai ïa ki kyntien pdiang sngewbha, katba u bah W. Warbah, AS&WCO ula ai ki kyntien khublei.