Nongstoiñ, Jylliew 3: Kawei ka ïing ba shi por kaba la thaw khnang da ki bor District jong ka West Khasi Hills ban la pynlong kum kawei na ki jaka ban test Covid-19 myn ha ki bnai kiba dang shu dep, kaba don ruh ha Nonbah sor Nongstoiñ, ka la kylla pynban ka jaka leit bar, leit pynjhieh da ki katto katne ngut ki riew paidbah kiba ïaid lyngba ïa katei ka ïing kaba don ruh hapdeng surok Nonbah.
Haba jurip ïa katei ka ïing la lap shisha shibun ki dak ki shin, kaba la pynithuh shai ba ki don ki briew kiba la pyndonkam ruh ia katei ka jaka, kum ka jaka dih kyiad bad la ithuh shai ba mynmiet myniong lei lei ki don wat kiba leh awria ha katei ka ïing.
Shuh shuh haba kylli pyrthew ia ki nongñiah kali kiba ieng ha katei ka jaka, ki la ong ba ka jingdon jong katei ka ïing ka long kaba khlem nongrim bad kaba la pynjah burom lang ïa ki ruh. Namar, ki don ki briew kiba leh katba mon hapoh katei ka ïing wat ha ka por mynsngi, hynrei kim nud ban ong ei ei namar kam dei ka nongkynti jong ki. Ym tang katta hynrei kane ka ïing ka la pynkhap ngiah ïa ki mynta, namar katba nang mih ki sngi ki kali ruh ki la nang bun.
Ha ka jingshisha ki Taxi draibar ka Nongstoiñ, ki don la ka jong ka Association ban peit ïa ka bha ka miat jong ki para nongñiah taxi. Tangba balei ki nongialam kim peit ïa kane ka jingdonkam. Haba ïakren pat bad u bah P.D.Sangma khlieh duh ka District, u la ong shen yn pynpra noh ïa katei ka ïing namar ïa mynta ym donkam shuh.
