Nongstoiñ, Jylliew 2: Ka jingdon jong ki jaka jngohkai kiba itynnad ha West Khasi Hills ka la khring ïa ki briew na kylleng ki jaka ym tang na ki jylla hapoh ka ri India hynrei wat ïa ki nongshangkai pyrthei kiba na shabar ka ri ruh. Kumba ka long ha kine ki sngi ki jaka jngohkai hapoh ka District kum ka kshaid Weinia, shad Thum bad ka dewlynnong Nongkhnum, ki la kynjah jar namar ka jingsniew palat ka surok naduh Nongstoiñ.
Dei halor katei ka jingsniew palat jong katei ka surok, ba ki nongwan jngohkai na kylleng ki jaka kiba wan sha West Khasi Hills ki la ïatur beit sha Mawphanlur, namar ban leit sha katei ka jaka jngohkai ka surok ruh ka la biang, ki nongpynïaid ruh ki don beit man ka sngi bad ki jaka sah miet ruh ki la biang lut nadong shadong.
Nalor kata haba ïanujor ïa ka jingitynnad jong ka dewlynnong Nongkhnum bad ki kliar lum ba ithiang ha Mawphanlur ka kham itynnad bun shah ha Mawphanlur. Nalor kata ka jingkylluid jong ki jaka kienglieng ha ki pung kiba don ha Mawphanlur ka khring haduh katta katta ïa ki nongwan jngohkai.
U bah Bony Lyngdoh Lyngkhoi u ba dei u nongpynïaid jong ka Society kaba peit bad khmih ïa katei ka jaka jngohkai, haba pyntip ha u nongthoh khubor u la ong ba ha kine ki sngi naduh ba u slap u la kham duna, ki nong wan jngohkai ki tuid man la ka sngi.
U la ong ruh ba na ka bynta ban khring shuh shuh ïa ki nongwan jngohkai ha katei ka jaka, ki dang don shibun bah ki jingdonkam kiba hap ban pynbiang, kum ki lynti ïaid kjat ba ki nongwan jngohkai kin ïoh ban shangkai suwari, namar lada ki sah miet ki donkam ban pynlut ïa ka por ban leit da ka kjat shaduh kliar jong u Mawthadraishan.
Nalorkata ka jingpyn-itynnad ïa ka rud surok da kaba thung dieng baroh shilynter naduh ïew Markasa, ka jingbuh ïa ki kynja railing bad pynitynnad da kaba tah da ki radium ka long kawei pat kabynta kaban kham khring shuh shuh ïa ki nongwan jngohkai. U la ong ba lada ka Tourism Department jong ka sorkar, ka shimkhia bad kan thaw lad ban mang pisa na ka bynta ka jingpynitynnad shuh shuh, kan long ka jingmyntoi kaba khraw ïa ki paitbah nongshong shnong ha katei ka thaiñ.
