Mairang, Jylliew, 03: Saw ngut ki briew ki la mynsaw jur bad kawei ka longkmie ka la khladnoh ha ka jinghap jong kawei ka kali Getz kaba don ïa u nombar ML05E/5565 sha kawei ka wah kaba don ha ka shnong Shyrwang, ka shnong kaba dang hap hapoh ka Eastern West Khasi Hills District.
Kane ka la jia ha ka sngi Palei ka 2 tarik u Jylliew, 2022 ha ka por khyndai shiteng eiei mynstep.
Katkum ka khubor ba la ïohlum na ki Pulit jong ka Mairang Police Station, ki la pyntip ba kane ka kali kaba la niah da u Bah Phingbor Jana uba la 52 snem ka rta ka dei kaba dang mih na ka shnong Umjei ban leit sha Mairang hynrei ynda la poi ha kawei ka jingkieng ha ka shnong Shyrwang kaba don ha surok National Highway 44-E kane ka kali ka la hap nalor jingkieng sha wah.
Ha kane kane ka jingjia, saw ngut ki briew kiba shong hapoh kane ka kali kiba la tip kyrteng kum ka Kong Nijoin Warjri 29 snem ka rta na ka shnong Dommawlieh, Pariong, u Bah Stainly Pariong uba la 58 snem ka rta na ka shnong Umjei, ka kong Darilin Warjri kaba la 22 snem ka rta na ka shnong Umjei bad ka kong Biolinda Warjri kaba la 72 snem ka rta na ka shnong Umjei bad kynthup ruh u nongniah jong kane ka kali ki la mynsaw jur.
Ki Pulit kiba la ïoh jingtip halor kane ka jingjia, ki la leit mar mar ban ai jingïarap bad ïa kiba la mynsaw la pynkit da ki paidbah sha Tirot Sing Memorial Civil Hospital kaba don ha Mairang ban ïoh jingsumar. Hynrei ynda la poi ha Hospital, ki doctor ki la pyntip ba ka kong Biiolinda Warjri ka la khladnoh ha shwa ban poi hapoh Hospital.
