Shillong, Risaw 01: U Myntri uba khmih ïa ka tnat Excise u Bah Kyrmen Shylla ha sngi baar u la ong ba ka sorkar ka kwah ban pynlong ïa ka Meghalaya kum ka nongpynmih wine kaba heh tam ha kane ka thaiñ.
“Ngi kwah ban kyntiew ïa ka kam pynmih wine bad ngi kwah ban pynlong ïa ka jylla jong ngi kawei na ki jylla kaba heh tam kaba pynmih ïa ka wine na ki soh. Kane kan shim por,” ong u Bah Shylla.
“Hynrei ka long kaba sngewtynnad ban ïohi ïa ki nongrep jong ngi, kiba ha ki por mynshwa ki shait bret noh ïa ki soh hadien ba kim lah ban die ïa ki, hynrei mynta ki don ka jaka ban pyndonkam ïa ki da kaba shna ïa ki wine na ki soh. Kane ka don ka jingkylla kaba heh bha bad kumjuh ka jingmyntoi kaba heh na ka bynta jong ki,” u la bynrap.
U Myntri u la pyntip ruh ba kumba ka long mynta, ka tnat ka ai ka jingkyrshan ïa ki nongshna wine da ki soh da kaba ai ïa ki ka jaka ha kaba kin lah ban shna ïa ka wine.
“Ngi ai ka jingkyrshan ïa ki hynrei kam pat long kaba biang ngi donkam ban leh khambha ban kyntiew ïa ka kam pynmih ïa ka wine,” ong u Bah Shylla.
Haba ïadei bad ka jingkylli la ka sorkar kan pyrkhat noh ne em ban pynlong aiñ ïa ka kyiad Khasi, u Myntri u la ong, “Kaei ka kam kaba dei ban ïaid shakhmat, ngam lah ban kynthoh halor kane. Ka daw ka long ba ïa ka kyiad Khasi la shna na u Khaw bad kumba ka long mynta u khaw u dei ka jingbam kaba kongsan ïa ngi, kumta ngam lah ban ong eiei.”
U la banjur ruh halor ka jingdonkam ban pynlong ïa ka jingpule wadbniah halor kane ka bynta ha shwa ba ka sorkar kan shim ïa ka rai.
“Kadei ban don ka jingpule bniah halor kane. Hadien kane lehse ngin lah ban ïaid shakhmat lada ngi sngew ba ka lah ban leh,” ong u Bah Shylla.
