Shillong, Risaw, 01: Ka Khasi Students’ Union Mawthadraishan Circle kan pynlong ïa ka jingpynkup burom da ka Maitshaphrang Excellence Awards 2023-24 kum shi bynta ban ai mynsiem bad ithuh kyrpang ïa ki samla bad ki khynnah kiba la lah leh bha ha ka jingpule jong ki ha ki kyrdan bapher bapher.
Ka Seng ka kyntu ïa ki khun samla kiba hap ha ka jingkhmih jong ka Mawthadraishan Circle kiba kynthup naduh ki shnong kiba hap ha ka Hima Mawiang, kumjuh ki shnong ba hap hapoh ka thaiñ Mawlangsu lem ki shnong hapoh ka thaiñ Laitkseh kiba kynthup ïa ka Laitkseh, Marngor, ka Lawblei baroh kawei kiba pas bha ha ki jingpule/ eksamin bapher bapher kata naduh ka SSLC haduh kyrdan Ph.D ba kin phah ïa ki Marksheet ryngkat ka Residential Certificate jong ki ha lane shwa ka 15-10-2024.
La pyntip ruh ba kito kiba lah ban aplai ki dei ban long, ha ka SSLC kiba ïoh 75 persen shaneng, HSSLC 75 Persen shaneng, Graduate kiba ïoh Merit List bad ha ka Masters pat 75 persen.
Na ka bynta kiba pyndep ïa ka PhD la bthah ba kan dei na manla ki Department. Katba ha ka Vocational Course la kdew ba ki dei baning kiba ïoh First Class. Ïa ki jingtip ba kham bniah phi lah ban phone ha kine ki number harum – 6909213090 bad ha u 7085760089, ong ka kyrwoh ba phah da u Chairman ka Education Cell, KSU Mawthadraishan Circle u samla S.R Thabah.
