Shillong, Risaw 01: Ka kynhun ïalehkai jong ka Manipur bad ka Sikkim ki la ïoh ban khur ïa ka jingjop ha ka lympung ïalehkai jong ka North East Cricket Development Council’s 1st Senior Women’s Interstate Friendship T20 Tournament 2024 kaba long ha kane ka sngi Ba-ar ha Pahamsning Cricket Ground, ha Ri Bhoi.
Ha ka jingïakhun, ka Manipur ka la pynliem noh ïa ka Arunachal Pradesh da 3 wiket bad dang sah sa 7 bol ha ka Group A, katba ka Sikkim ka la jop ïa ka Nagaland da 4 wiket bad 8 bol ha kti ha ka Group B.
Ki nongïalehkai ba kham paw ha kane ka sngi ki kynthup ïa ka Monica Devi Ningthoujam na Manipur ha ka liang ki nongkawang bol naba ka ïoh ban khur haduh san wiket bad ai kamai pat tang 13 ron ha ki saw over pyrshah ïa ka Arunachal Pradesh.
Katba ka Samayita Roy Prodhan ka la ïoh ban kamai haduh 55 ron na ki 43 bol na bynta ka Sikkim ba kynthup ïa ki hynriew tylli ki saw ron bad ar tylli ki hynriew ron.
Haba phai sha ka jingïalehkai, ka Arunachal Pradesh hadien ba ka la jop ïa ka jingkynting pisa ka la jied ban tied nyngkong bad ïoh kamai 101 ron la 8 wiket na ki 20 over.
Ki nongtied ba kham paw ha kane ka jingïakhun dei ka Nabam Abhi kaba la ïoh kamai 23 ron katba ka Nabam Yapu pat 21 ron khlem pat khyllem. Ka jingïalehkai bha jong ka Monica ha ka liang ki nongkawang bol na Manipur ka la pynlong ïa ki thei kamai ron ka Arunachal Pradesh ban ym lah shah shan slem haduh ba kan da ïoh khur haduh san wiket tang marwei hi.
Haba beh pat ïa ka thong, ka Manipur ka laduh haduh lai ngut ki nongkamai ron tang ha ki lai ron ba ka ïoh ban kamai. Hynrei dei hadien ka jingneh kham slem jong ka Chingkheileima Chanu Mangsatabam kaba ïoh 32 ron ba ka rukom ïalehkai kala kham skhem. Na ka liang ki nongkawang bol ba kham paw ha an ka Arunachal Pradesh dei tang ka Sarpik Ligu kaba ïoh lai wiket na ki 13 ron ba ka ai kamai.
Ha kawei pat ka jingïakhun, ka Nagaland kaba la hap ban tied nyngkong hadien ba ka Sikkim ka la jop ïa ka jingkynting pisa ka la lah ban kamai 103 ron la 3 wiket ha ki 20 over. Na kine dei tang ka Sentilemla Imsong kaba ïoh ban kamai kham bun kata 33 ron khlem pat liem bad ka Limatola 21 ron. Hynrei kiwei pat ki nongkamai ron ka Nagaland lada shu khein kyllum ki ïoh kamai tang 5.15 ron marwei.
Ka Pramila Limboo marwei ka la ïoh ban khur ar wiket na ki lai wiket kiba khyllem ha kane ka sngi.
Haba beh ïa ka thong ka Samayita ka la ïoh ban ïalam ïa ka Sikkim ban pyndep ïa katei ka thong da ka jinglah jong ka ban kamai hi marwei palat ïa ka 50 ron. Ha ka por ba ka shah pynkhyllem noh ka Sikkim ka la ïoh kamai 76 ron la saw wiket bad ka donkam sa tang 28 ron ban jop. Tangba khlem jingeh, ka kynhun ka la poi sha ka thong lyngba ki 18 ron na ka Anjeel Lepcha.
