Shillong, Risaw 01 : Ki thei ïalehkai kriket ka Meghalaya mynta ka sngi kin hap ban aireng pyrshah ïa ka Manipur ha ka lympung ïalehkai jong ka North East Cricket Development Council’s 1st Senior Women’s Interstate Friendship T20 Tournament 2024 ha Pahamsning Cricket Ground, ha Ri Bhoi ha ka por 9:00 baje mynstep. Katba ha ka jingïakhun kaba bud pat kan long hapdeng ka Sikkim pyrshah ïa ka Mizoram ha ka por 12:30 baje mynsngi.
Kine kin dei ki jingïakhun ba khatduh na ka Group ha shwa ka jingïakhun ïa ka semi final ha ka sngi Palei. Ha ki jingïakhun ba la dep ka Meghalaya ka la lah ban pynïakhaid bad ka Arunachal katba ka Mizoram ka la shah rem ha ka Nagaland. Kumta kine baroh ar tylli ki kynhun ki hap ban ïakhun tyngeh ban khur ïa ka jingjop kaba nyngkong ha kane ka lympung ïalehkai.
