Shillong, Jylliew 02 : Ka shnong Umphrew, kawei na ki nongrit kaba hap ha Mawlai C&RD Block ka kylla long ka shnong kaba nyngkong eh ban pyntreikam ïa ka Amrit Sarovar, kaba dei ka skim shna pung um ba ka sorkar pdeng ka bthah ban shna ha baroh kawei ka ri India.
Ka jingthmu jong ka sorkar pdeng ban phah shna da kitei ki pung um ha man la ki jaka da ka jingsnohkti lang ki nongshong shnong lyngba ka skim MGNREGS ka long ban pynkyndit bynriew noh ïa ki ba ka por ka la donkam kyrkieh ba ki paidbah kin tip kumno ban pynlang ïa ka um na ka bynta ka jingdonkam ba man ka sngi bad na bynta ka lawei ruh.
Ïa kane ka projek tih pung um kumjuh ïa ka jaka sara tynrai dieng la plie paidbah da u Myntri ka tnad C&RD Bah Hamlet Dohling ryngkat ka jingdonlang u Mission Director ka State Rural Employment Society u Sibhi Shakravarty Sadhu, nangta u Project Director DRDA Bah D Hynñiewta bad ruh u Block Devopment Officer ka Mawlai, Bah PT Passah nalor kiwei kiwei.
Haba kren ha kane ka sngi, u Myntri u l aong ba lyngba katei ka projek, ka Meghalaya ka buh thong ban shna haduh 75 tylli ki pung um ha man ki distrik jong ka jylla. Shuh shuh u ong ruh ba ka jingkwah rhah bad ka jingkwah myntoi shimet ka poi haduh u pud ba bun ki khlaw ki btap ki syllen lut bad mynta lei lei ka Meghalaya ka la sdang ban sakhi ïa ka jingkylla ka mariang.
“Nga ai khublei ïa u Myntri Rangbah duh ka Ri, uba la wanrah ïa kane ka skim ban shna haduh 75 tylli ki pung um ha baroh kawei ka distrik. Peit ha Sohra bad Mawsynram ki pawnam ha ka jingjur slap ha ka pyrthei hynrei lada phai sha Sohra ki briew pat ki mad ïa ka jingkyrduh um namar ym ïoh ban pynlang ïa ka um bad baroh ka shu tuid ei sha wah Brahma bad wah Surma,” la ong u Myntri.
Shuh shuh u ong ruh ba tang ka sorkar hi kan ym lah satia ban leh ei ei lada ki paidbah kim sngewthuh bad shim lang ïa ka jingkitkhlieh na ka bynta ka lawei. “Sngewtynnad ban ïohi mynta ba wat ki Balang ruh ki la don ïa ka Environment Sunday,” u la bynrap biang.
U Myntri u ong ruh ba ki paidbah ki dei ban sngewthuh ba lada mynta ki lehbeiñ ïa ka mariang kan poi ka por ba ka mariang ruh kan sa ai da ka nongkylla ïa ki.
U Myntri hadien kane u la aiti ruh ïa ka work order kaba 17 lak tyngka sha u Rangbah Shnong ka Umphrew khnang ba kin lah ban pyntyllun stet ïa ka jingshna ïa katei ka pung pynlang um ha katei ka shnong.
Haba bynrap lang, u Mission Director ka SRES u la ong ba ka Meghalaya ka donbok haduh katta katta ba ki ïoh kyrhai ka um slap hynrei ka mad pat ïa ka jingkyrduh um namar ym lah satia ban pynlang ïa ka.
“Lada bteng kumne, kan buh jingeh bha bad lah ruh ban mad ïa ka jingkyrduh um ha ki por ban sa wan,” u la ong da kaba bynrap ba dei halor katei ka phang ba ki la shimkhia ban pynneh pynsah bad ban don ïa ki jaka pynlang um ha ki jaka nongkyndong.
Haba bynrap lang, u Mission Director ka SRES u la ong ba ka Meghalaya ka donbok haduh katta katta ba ki ïoh kyrhai ka um slap hynrei ka mad pat ïa ka jingkyrduh um namar ym lah satia ban pynlang ïa ka.
“Lada bteng kumne, kan buh jingeh bha bad lah ruh ban mad ïa ka jingkyrduh um ha ki por ban sa wan,” u la ong da kaba bynrap ba dei halor katei ka phang ba ki la shimkhia ban pynneh pynsah bad ban don ïa ki jaka pynlang um ha ki jaka nongkyndong.
Shwa kane, la sam ruh ïa ki khusnam sha ki khynnah kiba jop ha ki jingïakob dro jingdro bad airong ba la pynlong da ka Umphrew Secondary School, Umphrew.
Ha kane ka sngi ka la don ruh ka jingthung dieng bad ka jingleit jngoh ïa ka jaka ba shna ïa katei ka pung um.
