Shillong, Jylliew 01: Da kaba buh hakhmat ïa ka thong ban pynsngewthuh ïa ka jingktah jong ka tdem duma ïa ki sawdong sawkun ka mei mariang, palat 8,400 hajar tylli ki skul hapoh ka Jylla Meghalaya ki la ïashim bynta ban ïakhun pyrshah ïa ka jingpyndonkam ïa u duma.
Ka phang rakhe ha une u snem ka long, “Tobacco – Threat to our Environment”.
Ka National Health Mission, Meghalaya da ka jingïatreilang bad ka tnat Pule Puthi ka Sorkar Jylla lem bad ka Samagra Shiksha ki la rakhe ïa kane ka sngi ha State Convention Centre, Shillong.
U Additional Chief Secretary jong ka Sorkar Jylla uba peit ïa ka tnat Pule Puthi u Bah Shri. D. P. Wahlang u la ïaroh ïa ka jingtrei shitom jong ka tnat ka Koit ka Khiah, ka tnat Pule Puthi bad ka Sambandh Health Foundation ban ïalap pyrshah ïa ka jingpyndonkam ïa u duma ha kylleng ka jylla baroh kawei da kaba ïatreilang bad ki skul.
Da kaba pynkynmaw halor ka jingktah jong ka tdem kaba mih na u duma ïa ka mariang bad na ka jingbam ïa u duma kaba ktah ïa ka koit ka khiah, u Bah Wahlang u la kyntu ïa ki khynnah skul ba kim dei satia ban ngop ha ka jingbam ne dih ïa u duma bad ban kyntu ïa ki ban long ki nongrah khubor ban ïalap pyrshah ïa ka jingpyndonkam ïa u duma da kaba ïalap ïariew sha la ki bahaing hasem, ha skul bad ha ka imlang ka sahlang.
U Additional Secretary ka tnat ka Koit ka Khiah ka Sorkar Jylla u Ram Kumar. uba long ruh u Mission Director jong ka National Health Mission, Meghalaya u la ïathuh ïa ki jinglap ba ka Jylla Meghalaya ka dei ka jylla kaba bun kynrei bha ki briew kiba ngat ha ka jingpang bampong, kum ha u tang nguid, ki dohjem, ka khmut, u ryndang.
Haba banjur ïa ka jingdonkam ban leit mar mar sha ki jaka ai jingsumar lada don kano kano ka jingsngewpher ha ka met bad ban kiar noh na ki jingmlien kiba sniew, u Ram Kumar u la ong baka jingïashim bynta lang jong ki skul ha ki District bad ki Block ka long ka bynta kaba kongsan bha khnang ban ai jingpynshai halor ka jingktah jong u duma ïa ka koit ka khiah, ïa ka shnong ka thaw bad ïa ka mariang.
Ki Rangbah Shnong, ki Kmie ki Kpa, ki MLA bad ki nongïalam Niam ki dei ban kyrshan lang ïa kane ka jingïalap paidbah. “Lada pynlong kum ïa kane ka prokram manla ka hynriew bnai, ngi la thikna ba ngin sa ïohi ïa ki jingkylla ha ki shnong ki thaw,” u la bynrap.
