Phah khang ka Sorkar ïa ka AAI ban ym shah hiar ka liengsuiñ ba shong u Avimukteshwaranand ha Umroi

Shillong, Nailur, 27: Hadien ba ka la mih ka jingpyrshah kaba jur bha na kiba bun balang, ka Sorkar Meghalaya ha ka sngi Thohdieng ka la rai ban phah da ka jingthoh sha ka Airport Authority of India (AAI) ba kan khang na ka bynta ka jinghiar ka liengsuiñ kaba kit ïa ka kynhun ki nongïalam niam Hindu ha Shillong Airport ha ka sngi Saitjaiñ.
Ïa kane ka rai la shim ha ka jingïalang jong ka high-level meeting ba la pynïaid da u Chief Secretary u Bah Donlad P. Wahlang ha kaba la ïashim bynta lang da ka Director General of Police (DGP) ka Kong Idashisha Nongrang, ki bor synshar na Ri Bhoi bad na East Khasi Hills bad ki ophisar na ka tnat Kam Pohing ka Sorkar Jylla.
Ka jingpynlong ïa kane ka jingïalang ka long hadien ba la ïoh jingtip ba u Jagadguru Shankaracharya Swami Avimukteshwaranand Saraswati un wan poi ha Shillong Airport da ka liengsuiñ barit ha ka sngi Saitjaiñ. Ka jingwan jong u ka long ban ïalap na ka bynta ban khang noh shisyndon ïa ka jingshohdoh ïa ka masi kaba la pynmih ïa ka jingpyrshah kaba jur na ki paidbah nongshong shnong ka jylla.
Ki dkhot jong ka Khasi Students’ Union, ka Hynñiewtrep Youth Council bad ka Hynñiewtrep Integrated Territorial Organisation (HITO) ruh ki la hiar sha Shillong Airport ha ka shnong Umroi ban pyrshah ïa ka jingwan jong ki nongïalam ïada masi.
Ha ka jingïakren bad ki lad pathai khubor, u Chief Secretary Bah Wahlang u la ong, “ba pynthikna ba kan ym don kano kano ka jingpynthud ïa ka shongsuk shongsaiñ ha kane ka jylla bad khamtam eh ha Ri Bhoi bad ha East Khasi Hills, ngi la shim ïa ka rai ban thoh na ka liang jong ka Sorkar sha ki bor ba dei peit jong ka Airport Authority of India (AAI) ban ym ailad ïa ka liengsuiñ ban hiar ha kad liengsuin ha Umroi lashai sngi.”
“Ngi la ïoh pdiang ïa ka jingpyntip ba ki lah ban don ki briew kiba pyrshang ban wan lashai ka sngi lyngba ka Shillong Airport bad ban pynlong ïa ka jingïaid paidbah ha ka kyrteng ban ïada ïa ka masi bad ban pynthikna ruh ban khang shi syndon ïa ka jingshohdoh ïa ka masi ha baroh kawei ka ri. Kim shym la pan jingbit ban pynlong ïa ka jingïaid paidbah. Kim shym la pan jingbit ban pynong ïa kino kino ki jingpyrshah hynrei ngi dang shu ïoh jingtip ba kan don ka liengsuiñ kaba rit ka ban wan hiar ha Shillong Airport ha Umroi lashai ka sngi,” u la ong.
“Ngi la bishar bniah ïa ki jinglong jingman nadong shadong bad ki bor synshar ka Ri Bhoi District hadien ka jingïasyllok bad u Deputy Commissioner bad kumjuh ruh la ïasyllok bad ki bor synshar District kiba peit ïa ka nongbah Shillong, bad kata ka dei ka rai kaba ngi la shim,” la bynrap u Chief Secretary.
U la ïathuh ba ha Shillong, East Khasi Hills, ïa ka Section 144 kaba ïa mynta la tip kum ka Section 163 jong ka BNSS la dep ban pynjari ban khanglad ïa kino kino ki jingïaid paidbah bad ki jingïalang paidbah bad kumjuh ruh ha Ri Bhoi District la pynjari ruh kumjuh.
U Bah Wahlang u la ïathuh ba ka Sorkar ka la ïasyllok bad ka Central Puja Committee (CPC), ha kaba ki la kren da ka sur kaba shai ba kim kyrshan satia ïa ka jingïaid paidbah ban pynbna ïa ka masi kum ka kmie.
“Ki la pyntip ba ha ka 2 tarik, Risaw, ka dei ka sngi kaba kyrpang ha ka lehniam puja, ka dei ruh ka jingsdang jong jinglehniam jong ki bad kim kwah ban ïadon bynta eiei kum ka kynhun ha ka jingïaid paidbah bad kim shym la satia wat ïa ka jingkyrshan. Ki la pynpaw ruh ba kim don jingtip satia shaphang ka jingpynlong ïa ka jingïaid paidbah ka ban sa long bad ki la kren ruh da kaba shai ba kin ym ai jingkyrshan,” u la ong bad bynrap, ‘ngi la ïasyllok da ka jingshim rai lang bad ki kynhun bapher bapher hadien ba la pyrkhat sani bha ngi la shim ïa ka rai ba ngin phah da ka jingthoh sha ki bor ba dei peit jong ka Shillong Airport ban ym shah hiar ïa ka liengsuil.”
Haba kylli, u Chief Secretary u la ong ba kum shi bynta ban shim ïa ki lad jingïada, ki Pulit kin pynlong ruh ka jingpynap ktem lada jia ba ki kynhun ïada masi ki thaw buit da kaba pyrshang ban rung na kiwei kiwei ki khyrdop.
“Hynrei kumba nga ong, kam don satia kano kano ka jingkyrshan wat na ki nongshong shnong ka jylla. Ka CPC ka ladep kren da kaba shai ba kim kwah ban ïadon bynta eiei. Ngam thikna kaei ka buit barieh sha lyndet jong kine ki briew kiba wan nabar hynrei kaei kaba ngi sngewkhia, ngi la pynkhreh bad ngin peitngor ba kan ym don kano kano ka jingmih jingkulmar kaba ktah ïa ka shongsuk shongsaiñ, namarkata, ngi la mana shah hiar ïa ka liengsuiñ,” u la ong.
Halor kawei pat ka jingkylli, u Bah Wahlang u la ong, “dang mynta ka sngi ha ka por shiteng sngi la ai jingbit ïa kawei ka liengsuiñ ban hiar bad ngim tip mano ba wan hynrei ka la don ka jingkynnoh ha ka jingshisha mynta ka sngi ha ka por mynstep ka la don ka khubor ba kin wan hiar mynta ka sngi hynrei long ka khubor kaba bakla bad kumta ngim shym la leit, ngi hap ban da ïoh ïa ki jingtip kiba thikna. Hadien ba ngi la ïoh ïa ki jingtip na ki bor pynïaid jong ka kad liengsuiñ mynta ngi la pynlong ïa kane ka jingïalang High Level Meeting bad ngi la rai ba kino kino ki sienjam kiba ngi shim kin long tang hadien ba la ïoh ïa ki jingtip kiba bniah hynrei ym ban shu ngeit tang ha ka jingmutdur.