Shillong, Nailur, 27: Ka Deputy Commissioner jong ka East Khasi Hills ka Kong RM Kurbah katkum ka iktiar ba la pynkup bor da ka Section 163 BNSS ha ka sngi Thohdieng ka la mana ban pynlong ïa ka jingïaid paidbah ha nongbah Shillong kaba lah ban ktah ïa ka shongsuk shongsaiñ.
Ha kane ka hukum, ka Deputy Commissioner ka la ong ba la ïoh jingtip ba ki don katto katne ki kynhun kiba thmu ban pynlong ïa ka Gau Dhwaj Sthapana Bharat Yatra ha Shillong ha ka 2 tarik Risaw, 2024 khlem kano kano ka jingpan jingbit.
Khnang ban khanglad ïa kino kino ki jingjia kiba lah ban pynthud ïa ka shongsuk shongsain ha nongbah Shillong bad ha East Khasi Hills District baroh kawei, namarkata, katkum ba la pynkupbor da ka Section 163 BNSS, ka Deputy Commissioner ka la mana ban ïalum paidbah san ngut shaneng na ka bynta ban pynlong ïa ka jingïaid paidbah hapoh ka jylli jong ka nongbah Shillong baroh kawei.
La khang ban ïaid kynhun san ngut shaneng hapoh ka nongbah Shillong baroh kawei bad ha kajuh ka por ka Deputy Commissioner ka la maham tyngeh ruh ïa kino kino kiba pynkheiñ ïa kane ka hukum kin shah pynshitom hapoh ka Section 223 jong ka BNS ne katkum kino kino ki kyndon kiba shah.
Namarba kane ka kam ka long kaba kyrkieh, kane ka hukum kan treikam noh mardor tad haduh ban da pynbna thymmai da kumwei pat.
Ha kajuh ka por ka Deputy Commissioner ka la pyntip ba kane ka hukum kan ym treikam satia ïa kano kano ka kynhun niam kaba la pan jingbit na ka ophis jong ka Deputy Commissioner tangbah kin hap ban bud katkum ki kyndon kiba ladep ban bthah.
