Shillong, Jylliew : U Joint Director of Health Services (SS), Civil Hospital, Shillong da kane u pyntip ba ki don sawtylli ki met ïap ki ba don mynta hapoh ka jaka buh met ïap jong kane ka hospital ïa ki ba ym pat shym la don ba wan kam haduh mynta.
Kine ki met ïap ki kynthup ia uwei u nongpang bym lah ban tip kyrteng 70 snem rta u ba shong ba sah ha ki thaiñ Anjali ïa u ba la wan pynkit da ka kali 108 ha ka 25.05.2022 shapoh kane ka hospital hadien ba u la khlad noh ha ka 31.05.2022 ha ka por 6:40 jan miet.
Uwei pat u nongpang u dei u ba la tip kyrteng kum u Bah Rishan Kharbuki, 35 snem rta u ba shong ba sah ha ki thaiñ Upper Shillong u ba la wan shah sumar hapoh kane ka hospital ha ka 3.12.2021 bad khlad noh ha ka 3.12.2021 ha ka por 9 baje mynmiet.
Saw uwei pat u nongpang u dei u ba la tip kyrteng kum u Ajay Narayan 32 snem rta u ba shong ba sah ha ki thaiñ Lawmali u ba la wan shah sumar ha ka 5.12.2021 bad khlad noh ha ka 5.12.2021 ha ka por 7:45 jan miet.
Nalor kata sa kawei pat ka met ïap jong u rangbah ba la tip kyrteng kum u Bishnu Bengali, 67 snem rta u ba shong ba sah ha ki thaiñ PAB, Civil Hospital Shillong u ba la wan shah sumar ha ka 18.12.2021 bad khlad noh ha ka 19.12.2021 ha ka por 11:05 mynstep.
Namar kitei ki met ïap ba la kdew haneng mynta ki la pyut, kumta na ka liang utei u heh ba dei khmih jong ka hospital u la kyntu ïa ki ba haïing hasem bad kiwei pat ki ba don jingïadei bad kitei ki briew ba la khlad noh ba kin wan shimti noh ïa kine ki met ïap napoh ka jaka buh metïap jong kane ka hospital hapoh ka laisngi hashwa ban aiti sha ki bor ka Shillong Municipal Board ba kin leh ïa ka ba donkam.
