Dei ba tieng ïa ka BJP na Delhi, ym nud rai u CM halor ka Yatra khang bam doh masi: Ardent

Shillong, Nailur, 26: U President ka Voice of the People (VPP) u Bah Ardent Basaïawmoit u la ther tyngeh ïa u Myntri Rangbah ka Jylla u Conrad K. Sangma halor ka jingthet kti jong u ha kaba ïadei bad ka jingpan jingbit jong ka kynhun niam Hindu ban pynlong ïa ka Yatra ne ka jingïaid paidbah ban khang bam doh masi ha nongbah Shillong ha ka 2 tarik, Risaw, 2024.
Haba kren ha ka jingïalang ai khublei jong ka VPP ha Rambrai ha ka Sngi Palei, u Bah Ardent u la ong ba ka jingkhynñiat jong u Myntri Rangbah ne ka jingbynshet jong u sha ka Deputy Commissioner ban ai ne ban nym ai jingbit, ka pyni ba u tieng thot thot ïa ka Sorkar NDA ba la ïalam da ka Bharatiya Janata Party (BJP) na Delhi.
“Kumno u Myntri Rangbah um nud ban ong beit ba ka Sorkar kan nym ai jingbit ban pynlong ïa kane ka Yatra namarba ka lah ban mih ka jingkulmar haba kiba bun ki la pyrshah ban pynlong ïa kane ka Yatra,” ong u Bah Ardent.
“Kane jingbym shim jingkitkhlieh jong u Myntri Rangbah kumba leh kiwei pat ki Sorkar ha ka thaiñ Shatei Lammihngi ban nym ailad ïa ka jingpynlong ïa kane ka jingïaid Yatra, ka pynpaw shai ba u Myntri Rangbah um nud ban shim ïa ka rai kaba long pyrshah ïa ka BJP na Delhi,” la kynthoh u President ka VPP.
Lyngba jong kane, ong u Bah Ardent ka la pynskhem ruh ïa ka jingong kiba bun ba ka NPP ka dei tang ka dur bula jong ka BJP.