Shillong, Nailur 25 : Ka sorkar ka buh thong ba kan lah ban lum tam shuh sa kumba 5-10 persen ka khajna da kaba pyndonkam noh daki QR Code ha ki jingdih kiba mih lyngba ka tnad Excise khamtam eh ka kyaid.
Ïa kane ka la ïathuh da u Myntri Rangbah ka jylla Conrad K Sangma haba kren bad ki lad pathai khubor hadien ka jingïalang jong ka kynhun Myntri.
“Ngi la mynjur ïa ka jingtyrwa ban don noh da ki QR Code kiban buddien ïa ki mar bapher bapher kiba die lyngba ka Exise Department. Da kaba leh kumne yn suk ruh ban buddien ïa uwei ba uwei u bilor (jingdih) ba die ha Meghalaya namar u don ïa u QR Code. Kane kan pynsuk ruh ïangi ban buddien ïa ka lynti ïaid jong ki bilor jingdih bad ruh ban tip shaei la pynpoi bad na kaei ka dukan kaba die khamtam eh lada don kano kano ka jinglait ei ka khajna,”u la ong.
Watla u Myntri Rangbah um treh ban kren ei ei la kane ka sienjam ka long ban khanglad ïa ka jingjur palat ka jingdie tuh ïa ki jingdih pynbuaid, hynrei u la ong pat ba kane kadei shi bynta ban kyntiew shuh shuh khambun ïa ka khana.
“Ngi la khmih lynti ba kane kan don jingkiew kumba 5-10 persen ka khajan ba ïoh lum bad ruh ïa ka jinglait ei ka khajna kaba ngi ïohi mynta yn sa lah ban khanglad da kaba pyndonkam da ki QR Code technology,” u la ong.
Katkum ka jingong jong u, kane ka jingtyrwa ka long ban pynbeit thoiñ ban pyntikna ba kan ym don shuh ka jinglait ei kakhajna shabar.
Ha kajuh ka por u Myntri Rangbah u la pyntip ruh ba ka kynhun Myntri ka la mynjur ban don noh da ka Composite license na ka bynta ki hotel.
“Kane kadei hadien ba bun ki hotel khamtam ki hotel 5star kiba la don mynta bad kiban dang wan nangne shakkhmat,” u la ong. U ong ruh ba mynshwa ïa ki laisen la ai sha ki hotel bapher bapher lane ki restaurant bad ki bar ba lada kino kino ki hotel ki don saw tylli ki bar lane saw tylli ki restuarant kumta ki hap ban shim saw tylli ki lai sien na bynta kitei ki bar.
Hynrei, mynta pat u la ong ba kim donkam shuh ban aplai la ka jong ka laisen namar la lah ban ai hajuh lane da ka composite license.
