Shillong, Nailur 25: U Bah Zosiama Thianglai, Sordar ka Saipung Sirdarship hynne ka sngi Balang, u la leit kynduh ïa u Lat ka jylla u CH Vijayashankar ryngkat bad ki katto katne ngut ki dkhot ka Saipung Sirdarship.
Ha ka jingïakynduh ïa u Lat, u Zosiama Thianglai u la pynpaw ka jingsngewkmen halor ka jingïoh ïa ka lad ban ïa kynduh ïa u Lat bad u la ïoh ban ïakren ïa ki mat kiba ïadei bad ka bha ka miat bad ka roi ka par jong ka Elaka Saipung.
U Bah Zosiama ula pynpaw ha u Lat ka Jylla haba ïadei bad ka riewspah jong ka kolshor bad ki riti dustur jong ki briew ka elaka Saipung bad u la pan ka jingkyrshan na u Lat bad ka Sorkar Jylla halor ki mat bapher bapher kiba ïadei bad ka jingroi ka imlang sahlang jong ka thaiñ.
U Lat u la ïaroh ïa ka jingshimkhia jong u Sordar na ka bynta ka bha ka miat jong ka imlang sahlang ha Saipung bad u la pynthikna ïa u ba ka Ophis Raj Bhavan kan bteng ban ai jingkyrshan ha kaban weng ïa ki jingeh jong ki paidbah ban ïoh ïa ka roi ka par.
