Pynkup burom ka Nongstoiñ College ïa ki 440 ngut ki samla pule bad ïa kiba ïoh Merit List
Nongstoiñ, Nailur 24: Ka Nongstoiñ College ha ka sngi ba ar ka la rakhe ïa ka sngi kyrpang ki samla pule kiba la pyndep ïa ki jingpule lane Graduation Day, ha kaba la ai burom ïa 440 ngut ki samla pule, kynthup 383 ngut na ka Arts Stream, 41 ngut na ka Science bad 16 ngut na ka Commerce Stream.
Ha kane ka sngi u Chief Secretary ka Sorkar Meghalaya Bah D.P Wahlang, u la long u Kongsan ha ryngkat ka jingïadonlang u Bah Macmillan Byrsat, MLA barim jong ka Nongstoiñ, Chairman jong ka Governing Body jong ka College, Dr. L. L Mawsor President ka Sponsoring Body, u Symbud Deputy Commissioner Bah H. K Thabah, u Superintendent of Police WKH, u B. D Marak, ka Principal jong ka Nongstoiñ College Dr. (Mrs) Ïaisan Mawthoh, ki nonghikai, ki samla pule bad kiwei kiwei.
Ha kane ka jingrakhe, la pynkup burom kyrpang ruh ïa ki lai ngut ki samla pule kiba dei ki merit holders na ka college, kata u Bah Shembhalang Kharsyntiew u ba la ïoh ïa ka kyrdan ba 7 ha ka Zoology (7th Position), kong Habaphilari Kharbani, ba la ïoh ïa ka kyrdan ba 8 ha ka Geography (8th position) bad Kong Larihun L. Rngaid ba la ïoh ïa ka kyrdan ba 9 (9th Position) ha ka Biochemistry. La ai jingithuh ruh ïa ki nonghikai jong kine ki lai tylli ki subject kiba la ïarap ban kyntiew ïa ki samla pule ba kin ïoh ïa kine ki jingjop.
Ha kane ka sngi la ai burom ruh da ki memento bad certificate ïa baroh ki samla pule ba la pyndep ïa ka graduates jong ka batch 2024 ha ka Arts, Science, bad Commerce streams.
U Bah D.P Wahlang Chief Secretary ka sorkar Meghalaya, haba ai jingkren u la pynpaw ïa ka jingkordor jong kane ka sngi na ka bynta ka college bad khamtam ïa ki samla pule ba la pyndep ïa ka graduates. U la ïaroh ruh ïa ki nonghikai bad ki dkhot ka faculty kiba la trei shitom ban ai jinghikai ba paka ïa ki samla pule ban kyntiew ïa ka jingnang jingstad jong ki.
U la ong ba ki samla kiba la pyndep ïa ka jingpule ki don ïa ka jingkyrmen bad ka jingshai na ka bynta ban kyntiew sha jrong ïa ka jylla ha ki liang baroh. Kata naduh ki kam ha ka Sorkar, ka kamai kajih, ka pule puthi, ka kam shakri paidbah ne ha kano kano ka bynta.
U la ai khublei ïa baroh ki samla pule kiba la kynjoh ïa kane ka thong bad u la pynpaw ka jingïaroh ïa ki kmie ki kpa bad ki nonghikai kiba la ai jingkyrshan bad ïalam lynti ïa ki.