Palat 20 lak pyllut u James ban shong Helicopter por ba long Myntri bording

Shillong, Jylliew 02: U James K. Sangma, u la pyllut haduh 20, 82,208 tyngka ban leit jingleit da ka Helicopter, ha ka por ba u dang bat kum u Myntri ka tnad bording.
Kane ka la paw sha ka shithi ba la phah da u DD Shira, MCS, Joint Secretary to the Government of Meghalaya, Power Department ha ka 31 tarik u Jymmang 2022 sha u Director (Distribution) Meghalaya Power Distribution Corporation Ltd.
Kane ka jingphah u Shira sha u Director ka long hadien ba u la ïoh ïa ka shithi na ka Tnasport Department ha ka 11 tarik u bnai Lber 2022, kaba pan ban siew noh ïa kane ka Bill bai leit jingleit u James da ka Helicopter.
Kaei kaba phylla na kane ka shithi ka long ba u Joint Secretary, u la phah kdew ruh ïa ka Head of Account ba la mang na ka bynta kane ka jingleit jingleit u Myntri bad kumjuh ruh ïa ka jingdon pisa ban siew ïa kane ka Bill.
Ha kajuh ka por, ha kane ka shithi la bthah ruh ba lada ym don pisa na ka Head of Account kaba dei na ka bynta ban jingleit jingleit, dei ban pyrshang ban wad ki lad ki lynti na kiwei pat ki head, khnang ban ïoh siew ïa kane ka Bill.
Lah ban kdew hangne ba u James K.Sangma u la bat ïa ka tnad bording naduh ba sdang jong ka sorkar MDA ha u snem 2018, kynthup ruh ïa ka tnad pohïing, ka tnad khlaw bad kiwei kiwei. Hynrei ha ka 12 tarik u Rymphang 2020, u la shah knieh noh ka tnad pohîïing bad la aiti noh ha u Bah Lahkmen Rymbui. Ha ka por ba u bat ïa ka tnad bording la mih kiba bun ki kynrum kynram bad ka jingïakhih kaba jur na ki nongtrei bad ki Enjinra ka MeECL. Ladon ruh ka jingdawa ban weng noh ïa u na ka tnad bording badka jingdawa ka la mih ruh wat na ka Seng UDP kaba don lang ha ka sorkar. Dei ha ka 18 tarik u Nailur ka snem 2021 ha ka jingbate kam kaba khyndiat jong ki Myntri, u Myntri Rangbah, u Conrad Sangma, u la knieh noh ïa ka tnad bording na ka u hymmen jong u bad ai ha u Bah Prestone Tynsong.
Haba la pyrshang wad jingtip ba kham bniah halor kane ka jingpyllut u Myntri barim ka tnad bording ïa ki tarik bad ki jaka ba u leit jingleit, ym shym la lah ban ïoh ka jingtip kaba bniah, hynrei ki khubor na ka tnad bording, ki la ïathuh ba kadei ka jingleit kaba tang lai sngi, tangba kim shym la ïathuh pat shano u leit.