Shillong, Jylliew, 02: Ki arngut ki khynnah rit kiba la shah bat ha ki trai dukan halor ka jingshah kynnoh tuh jingbam na kawei ka dukan ha Sor Shillong ki la shah khang ha ki bor pynïaid skul ban leit skul.
Ïa kane la pyntip da ka Chairperson jong ka Meghalaya State Commission for Protection of Child Rights (SCPCR) ka Kong Ïamon Syiem ha ka jingïakren bad ki lad pathai khubor ha ka sngi Palei.
Ka la ïathuh ba kane ka video kaba la pynsaphriang ha ka Social Media ïa ki arngut ki khynnah ba la shah kynnoh tuh jingbam ha kawei ka dukan ka la poi sha ki tyndong skhor jong ka Commission ha kaba ki bor pynïaid jong ka skul kaba ki pule kim shah shuh ban wan sha skul.
“Hato phi kwah ban shim ïa kata ka hok ka jong ki ba kin ym leit skul shuh. Ngi dei ban sngewthuh ïa kata, ngi pynduh aiu ïa ki? Ka Commission ka sngewkhia bha ïa kane ka jingpynjah burom ïa ki khynnah rit kaba long thik kumba ngi la pynduh ïa ka hok jong ka pule ka puthi ka jong ki,” la kren sngewkhia ka Kong Syiem.
“Nga kyrpad ïa ki paidbah ba kim dei ban kyrkieh ban pynsaphriang ïa ki video ki bym dei bad wat ju thad khamtam eh ïa ki khynnah rit. Lada phi ieid ïa ki, sneng bad pyni lynti ïa ki bad ïalam sha ki bor ba dei peit kiba lah ban ai jingïarap ïa ki,” la kyrpad ka Kong Syiem.
“Kine ki jingjia kiba ladep, ka aiñ kan sa leh la kamram,” la maham ka Kong Syiem bad ka la kyntu ruh ïa ki paidbah ba kin sngewbha ban pyndam noh ïa ki dur bad ïa ki video bad long ki briew kiba shimkhia ïa kum kine ki jingjia bad ban don ïa ka jingkitkhlieh,” ka la ong.
“Kynmaw ba ki jingkynthoh (ha ki Social Media) ki dei kiba kongsan bha namarba ki khun jong phi ruh ki bat ïa ka mobile phone bad ki pule ïa kaei kaba phi kynthoh kiba pynkylla dur ïa ki jingmut jingpyrkhat jong ki ruh bad kan ktah ïa ki.
